BŪMI BWA BENE KIDISHITU
Muswelo Otubwanya Kukwasha’ko shi Kubalongeka Kimpengele
Mu ano mafuku bimpengele bya kipangila bifikanga kitatyi ne kitatyi. Shi kubalongeka kimpengele, bukomo buloñwanga mwanda wa kukwasha boba baponenwe na kimpengele, bufwaninwe kwikala mu ndudi ne kwikala na bemaniji. Mu ano mafuku a mfulo, Kitango Kyendeji i kinene amba mu musambo ne musambo mufwaninwe kwikala Bilo Itala Bukwashi mu Bitatyi bya Bimpengele.
Kitatyi kivwana bano Batutu amba kubalongeka kimpengele, pampikwa kwija betanga bakulumpe ba kwine kulongekele kimpengele mwanda wa kuyuka bisakibwa bya basapudi. Shi i koneke bintu bivule, basapudi byokebabwanyapo kwilongolwela’byo abo bene, nabya musambo ukatuma batutu bafundijibwe mwanda wa kukemanina mwingilo wa bukwashi. Bano banabetu babwanya kulomba bengidi ba kwilanga, byabuntu kapanda nansha kupota bya kukwasha nabyo banabetu enka mu kifuko mulongekele kimpengele’kya.
Kudi byabuyabuya bivule bitamba ku kulonda ino ndudi. Kimfwa kwepuka kukwasha pampikwa kupebwa lupusa, kavutakanya, kujimija kitatyi ne lupeto bine bifwaninwe kulongwa na banabetu bemanine mwingilo wa bukwashi.
Banabetu bengidijibwa na musambo bo bayukanga buvule bwa lupeto, buvule bwa bengidi ba kwilanga ne kuyuka bisakibwa bya banabetu baponenwe na kimpengele. Kadi bo abo bakepangula balupusa bene babwanya kwitukwasha amba mwingilo wetu wa bukwashi ulongwe bya bukidibukidi. Nanshi kemwakakongakanyai lupeto banwe bene, kutuma bukwashi ne kwenda kokwa kulongekele kimpengele pampikwa kupebwa lupusa.
Na bubine shi kubalongeka kimpengele tusakanga kukakwasha’ko. (Bah 13:16) Tusenswe banabetu! Le i bika byotubwanya kulonga? Kya mvubu, tubwanya kulombelela’ko banabetu baponenwe na kimpengele ne banabetu bemanine mwingilo wa bukwashi. Kadi tubwanya kutūla byabuntu bya mwingilo wa ntanda yonso. Na buludiki bwa Kitango Kyendeji, misambo yo iyukanga i kwepi kusakilwa bininge bukwashi. Shi tusaka netu kukakwasha kokwa kulongekele kimpengele, tubwanya kudinga fomu Demande d’admission comme volontaire local développement/construction (DC-50).
TALAI VIDEO, DILOBE DYA KYONAKANYA DYALONGEKELE MU BREZILE, KUPWA LONDOLOLAI KINO KIPANGUJO:
Le i bika bya kutulumuja pa mwingilo wa bukwashi wa Batumoni ba Yehova walongekele pa kupwa kwa dilobe mu Brezile mu 2020?
