Mwanda waka tusenswe bininge bitango bya ntanda byotuloñanga mwaka ne mwaka? Mwanda bitupanga mukenga wa kutōtela Yehova pamo na banabetu bene Kidishitu, enka na mwādi mulongela’byo bene Isalela. Tusangelanga bufundiji bonso botufundijibwanga’ko mwanda bwitufwenyanga pabwipi na Yehova. Kadi tusangelanga kwitana’ko na balunda ne na bisaka. Tusangelanga kutanwa’ko mafuku onso asatu.

Shi tubaikala na mukenga wa kubungakena pamo na banabetu, ketufwaninwepo kulangulukila enka pa bintu byotukamwena’ko, ino tufwaninwe ne kulangulukila pa muswelo wa kukalombola’ko buswe. (Ngt 6:10; Bah 10:24, 25) Tukalombola amba tusenswe batutu ne bakaka na kwibashitwila kibelo pobatwela, nansha kukwatyila enka bityi byotusakilwa. (Fid 2:3, 4) Bitango bya ntanda bitupanga mukenga wa pa bula wa kupwana na balunda bapya. Tubwanya kwitungila kitungo kya kukapwana’ko na muntu oketwiyukilepo nandi kumeso kwa mpangiko kushilula, pa nsá ya kukōkolokwa, nansha ku mfulo kwa mpangiko. (2Ko 6:13) Balunda botukapwana nabo uno muswelo bashalanga ke balunda ba nyeke! Kadi kya mvubu mpata, bantu betutala shi abamone buswe mu bukata mwetu, babwanya kukwata butyibi bwa kwilunga netu ketwingidila nabo Yehova.​—Yoa 13:35.

TALAI VIDEO BITANGO BYA MATANDA BINENA’MBA “BUSWE KEBUKANKALWANGAPO”!, KUPWA LONDOLOLAI BINO BIPANGUJO:

• Le ku bitango bya matanda bya mu 2019, bantunguluji bemwenine’ko buswe muswelo’ka?

• Le i muswelo’ka watendelwe bumo ne buswe bwa bantu ba Yehova?

• Le batutu ba mu Kitango Kyendeji besambīle pa buswe bwa bwine Kidishitu mu miswelo’ka mishileshile?

• Le buswe bwa bwine Kidishitu bwalungile pamo namani batutu ne bakaka ba mu Alemanye ne ba mu Korea wa Kunshi?

• Le tufwaninwe kusumininwa kulonga bika?