Panopano ponka kitūkijetyima kya Yehova pa ino ntanda kisa kufula. Bipwilo bya bubela bisa konakanibwa, mizo mīkutyile mu bumo isa kutamba bantu ba Yehova, kadi Yehova usa kwipaya babi bonso pa Amakedona. Bine, bene Kidishitu batēngele na kipyupyu kino kitatyi kya kasekuseku.

Na bubine, ketuyukilepo myanda yonso itala kyamalwa kikatampe. Kimfwa, ketuyukilepo kitatyi kyokisa kushilula. Ketuyukilepo bubinga busa kwingidija imbikalo ya politike mwanda wa kutamba bipwilo bulwi. Ketuyukilepo kitatyi kisa kwija bulwi busa kwitutamba mizo mīkutyile mu bumo. Kadi ketuyukilepo manwa asa kwingidija Yehova mwanda wa konakanya babi pa Amakedona.

Inoko, Bisonekwa bitulombola myanda yonso yotusakilwa mwa kulwila na bukankamane ku makambakano etutēngele kumeso. Kimfwa, tuyukile amba tudi ku mfulo ya “mafuku a mfulo.” (2Tm 3:1) Tuyukile amba kutambwa bulwi kwa bipwilo kusa ‘kwipipijibwa’ ne mutōtelo wa bine keusapo konakanibwa. (Mat 24:22) Kadi tuyukile amba Yehova usa kukūla bantu bandi. (2Pe 2:9) Ne kadi tuyukile amba yewa mutongwe na Yehova mwanda wa konakanya babi ne kulama kibumbo kikatampe pa Amakedona i moloke kadi wa bukomo.​—Kus 19:11, 15, 16.

Binkumenkume bya kumeso bisa kulengeja bantu ‘bapungile moyo.’ Inoko, kutanga ne kulangulukila pa mwādi mukwashisha Yehova bantu bandi ba pa kala ne pa byasa kulonga mafuku a kumeso, kubwanya kwitukwasha ‘twimane nshinkidingi ne kubandula mitwe yetu,’ koku tukulupile amba kunyongololwa kwetu kubafwena pabwipi.​—Luk 21:26, 28.