Kivulukilo kitupānga mukenga muyampe wa kulangulukila pa madyese a kumeso abwanikile kupityila ku kinkūlwa, kimfwa lusangukilo. Yehova kādipo usaka bantu bafwe. O mwanda njia ya kufwilwa muntu otusenswe itusansanga bininge. (1Ko 15:26) Yesu wāivwene bulanda pa kumona bana bandi ba bwanga badila lufu lwa Lazalasa. (Yoa 11:33-35) Yesu byadi kimfwa kibwaninine kya Shandi, netu tubwanya kukulupila amba Yehova nandi wivwananga bulanda paetumona mu njia ya kufwilwa baswe betu. (Yoa 14:7) Yehova utengele na mēlu kitatyi kyakajokeja bengidi bandi ku būmi, ne batwe bene kumo.—Yoba 14:14, 15.

Yehova byadi Leza wa ndudi, i biyampe tukulupile amba lusangukilo nalo lukalongekanga mu ndudi. (1Ko 14:33, 40) Pa kyaba kya madilo, akyo kikekala kitatyi kya kutundaila bakasangulwa. Le ulangulukilanga pa lusangukilo, nakampata mu kitatyi kya njia? (2Ko 4:17, 18) Le ufwijanga’ko Yehova pangala pa kinkūlwa kyaetupele ne pa kwitusokwela mu Bisonekwa amba bafwe bakekala bōmi monka?—Kol 3:15.

• Le i ani mu balunda nobe nansha mu babutule bobe otengele nakampata kwimona nandi monka?

• I bantu’ka ba mu Bible bosaka nakampata kuketana nabo ne kwisamba nabo?