KYO KWIKADILE NA MVUBU: 1 Bene Kodinda i mukanda ubadilwa mu mikanda 14 yālembele mutumibwa Polo mwanda wa kukankamika bakwabo bene Kidishitu. Muntu palemba mukanda wikalanga na mukenga wa kutonga bishima senene, kadi mukanda’wa ubwanya kukatangwa misunsa mivule na mwine utuminwa’o. Kulemba mikanda i muswelo muyampe wa kusapula bukamoni ku babutule ne ku bantu botwiyukile nabo. Kadi i muswelo mufike’po wa kupāna bukamoni ku boba botukomenwanga kwimona nabo mpala na mpala. Kimfwa, muntu ubwanya kusangela musapu inoko bikomo kumutana kwinjibo. Bibwanya kwikala bikomo kwimona na bantu bamo mu mwaba wetu mwanda wa kushikata kobashikata mu mobo alamwa, mu bifuko mukoma kutwela, nansha mu bifuko bya kulampe. Le i myanda’ka imo ya kulama mu ñeni, nakampata polembela muntu okuyukilepo?

MWA KWIULEMBELA:

• Lemba’mo enka byowadi ubwanya kumusapwila mpala na mpala. Witele ku ngalwilo kwa mukanda, kupwa shintulula patōkelela kine kyowalembela. Ukokeja kumwipangula kipangujo kya kulangulukila’po ne kumulembela adelese ya diteba dyetu. Kupwa, mulombole Bifundwa bya pa Entelenete bya Kwifunda Bible, mulombole motwifundilanga Bible nansha kumutelela’ko mitwe ya myanda imoimo ya mashapita a mu dibuku kampanda dyotwifundanga’mo na bantu. Ubwanya kuvungila’mo kalata ka bupempudi, kakanda ka lwito, nansha trakte

• Lemba bīpi. Lemba mukanda mwīpi keukapungijapo mwine ukeutanga.—Tala mukanda wa kulondela’po

• Tanga’mo mwanda wa kulemununa bilubo, ne kutala shi bilembwa bimweka biyampe kadi bipēla kutanga. Kadi tá mutyima amba mukanda’wa wikale mulembe bya bulunda, na bunwa ne na kikulupiji.