Mulunda muyampe uyukene bu “muntu omwisenswe nandi ne kwilēmeka banwe bonso.” Kimfwa, bulunda bwa ba Yonafane ne Davida bwāshilwile kutyita kitatyi Davida kyaāipaile Ngodiata. (1Sa 18:1) Bāpwene bininge mwanda bādi na ngikadila ikokela umo ku mukwabo. Nanshi shi usaka kupwana bininge na muntu, muyuke bidi biyampe. Bilombanga kitatyi ne bukomo pa kuyuka muntu biyampe. Inoko, pa malezo a mīsambo pa Entelenete bantu babwanya kwikala “balunda” kupityila’tu ku kamusapu kēpi. Kadi pa Entelenete, bantu bapēlelwanga kufya mwine mobekadile, mwanda kumeso kwa kwisamba nansha kulemba musapu balangulukilanga pa mu kebamwena bakwabo. O mwanda, i biyampe kupwana pa Entelenete na bantu ‘boyukile kala biyampe.’ Kokevwana moyo amba usa kusanshija muntu pa Entelenete shi ubapele kwikala mulunda nandi. Kupwana na bantu pa Entelenete byo kuvudile kuleta makambakano, o mwanda bamo balekele kwingidija malezo a mīsambo pa Entelenete. Inoko shi abe wi mukwate butyibi bwa kwiengidija, le i bika byofwaninwe kuta’ko mutyima?

TALAI VIDEO DYUMUKA POINGIDIJA MAlEZO A MĪSAMBO PA ENTELENETE, KUPWA LONDOLOLAI BINO BIPANGUJO:

• Kumeso kwa kulemba kintu pa Entelenete nansha kutula’po mafoto, le i bika byofwaninwe kulangulukila’po bidi?

• Mwanda waka ufwaninwe kutonga na tunangu bantu bopwana nabo pa malezo a mīsambo pa Entelenete?

• Mwanda waka ufwaninwe kwikala na mikalo pa kitatyi kyopityijanga pa malezo a mīsambo pa Entelenete?​—Ef 5:15, 16