Polo ne Shilasa bātendele Leza na ñimbo pobādi mu kifungo. (Bil 16:25) Mu ano etu mafuku, banabetu betabije baimbile ñimbo ya Bulopwe nansha byobadi mu Sachsenhausen komponi ka masusu ka Nazi mu Alemanye ne pobadi bavilwilwa mu Siberi. Bino bimfwa bilombola bukomo budi na ñimbo bwa kukankamika bene Kidishitu bekonda na makambakano.

Panopano ponka dibuku dipya dya ñimbo didi na mutwe wa mwanda unena’mba Twimbilei Yehova na Nsangaji, disa kutamba mu ndimi mivule. Po tusa kwiditambula, tukwatyilei binenwa bya ñimbo pa mutwe na kwifunda’yo mu butōtyi bwa kisaka. (Ef 5:19) Nabya, mushipiditu ujila uketukwasha tuvuluke’yo petufikila makambakano. Ñimbo ya Bulopwe ikokeja kwitukwasha tuté mutyima ku lukulupilo lwetu. Kadi ibwanya kwitukankamika potutanwa na matompo. Nansha ke kitatyi kyotudi na nsangaji ku mutyima, binenwa bya ino ñimbo ikunka mutyima biketutonona twimbe na nsangaji mwanda wa mutyima wetu mutūke. (1Bi 15:16; Ñi 33:1-3) O mwanda batwe bonso tulongei bukomo bwa kwimba biyampe ñimbo ya Bulopwe!

TALA VIDEO LWIMBO LUKANKAMIKA BENGIDI, KUPWA LONDOLOLA KU BINO BIPANGUJO:

• I mu ngikadilo’ka mwalengeje Tutu Frost alupule lwimbo?

• Le luno lwimbo lwakankamikile namani banabetu badi mu komponi ka masusu ka Sachsenhausen?

• Le ñimbo ya Bulopwe ibwanya ku kukankamika mu myanda’ka ya difuku ne difuku ?

• I ñimbo’ka ya Bulopwe yoloelelwe kukwatyila pa mutwe?