Mu Kweji 9, tusa kulonga bukomo bwa kushilula bifundwa bya Bible ku mwinē njibo yense na kwingidija boloshile Ikala Mūmi Nyeke! Basapudi bavule babwanya kutonga kwingila bu pania mukwashi na kutūla mansá 30. Le kano kampanye ka pa bula ka kalongwa namani?

• Mu Kwitana Kubajinji: Ingidija kibalu kya panyuma kya boloshile pa kulangula kusangela kwa muntu ne kumulombola mupityilanga kifundwa kya Bible. Lama mu ñeni bantu bonso balombola kusangela ne kwibajokela. Padi bantu bamo bapelele kwifunda Bible mafuku kunyuma, ino pano babwanya kusangela kwifunda’ye kupityila ku uno musapwilo mupya ne boloshile mupya. Musapudi kafwaninwepo kushiya uno boloshile ku njibo kwa mpikwa muntu nansha kwela’ye mu mikanda ne kupa’ye muntu kalombwelepo kusangela. Komite wa Mingilo wa pa Kipwilo ubwanya kuteakanya’ko mīsambo ya mwingilo wa busapudi mu uno kweji.

• Mikenga Mikwabo: Shi kipwilo kyenu kisa kwingidija kaditempa, mubwanya kutūla’po uno boloshile Ikala Mūmi Nyeke! Lombola boba balombola kusangela amba, tupānanga uno boloshile ku muntu usangedile kwifunda Bible ku bitupu. Lombola muntu mu kīpi mwifundilwanga uno boloshile nansha kumulaa kitatyi kikwabo. Mutadi wa Mingilo ubwanya kuteakanya basapudi ba bwino mwanda wa kusapula mu bifuko bya bantu bavule ne kushilula bifundwa bya Bible. Ubwanya kushilula kwifunda Bible na boingila nabo ku kaji, nansha bantu bowisamba nabo bya kiponka na ponka.

Yesu wētusoñenye ‘kulonga bana ba bwanga,’ ‘kwibafundija.’ (Mat 28:19, 20) Tusaka’mba kano kampanye ka pa bula kafikile pa kino kitungo na kwingidija boloshile, Ikala Mūmi Nyeke!