Yesu wābwenye kusapwila mwana-mukaji mwine Samadia bya kiponka na ponka, mwanda wāshilwile kwisamba nandi. I muswelo’ka otubwanya kulumbulula manwa etu a kushilula mīsambo na bantu boketwiyukilepo nabo?

• Mweka bya bulunda ne kwisamba na bantu. Yesu wāshilwile mīsambo yandi na kulomba’tu mema a kutoma nansha byaādi mukōke. Nobe ukokeja kushilula na kumwimuna na nsangaji, padi ne kwisamba nandi myanda ya mwikadile kūlu, nansha mwanda kampanda ulongekele. Vuluka amba kitungo kibajinji i kushilula mīsambo, nanshi wisambile pa mwanda o-onso ubwanya kusangaja muntu. Shi wapele kukulondolola, i kutupu kyowajimija. Tompa kwisamba na mukwabo. Lomba bukankamane kudi Yehova.​—Neh 2:4; Bil 4:29.

• Kimba mukenga wa kutweja myanda miyampe mu byomwisamba, inoko kokiyumbila. Loeja mīsambo. Shi uningile muntu, ubwanya kusela mutyima kūlu, kupwa wakuba talala. Kokatyumukwa mutyima shi muntu watyibe mīsambo kumeso kwa abe kumusapwila. Shi bikukomenanga mwa kushilwila pa kusapula myanda miyampe, nabya wiibidije na kushilula mīsambo pampikwa kitungo kya kusapula. [Tadija video 1 ne kwisambila’po.]

• Kimba’ko mukenga wa kusapula myanda ikunka mutyima itala lwitabijo lobe, ibwanya kulengeja mwivwaniki epangwile’ko bikwabo. Yesu wānenene myanda itenga mutyima yālengeje mwana-mukaji epangule bipangujo. Wādi umulondolola ku bipangujo, koku umusapwila myanda miyampe. [Tadija video 2 ne kwisambila’po, kupwa tadija video 3 ne kwisambila’po.]