BŪMI BWA BENE KIDISHITU
Tulumbululei Manwa Etu mu Mwingilo—Na Kuleka Bifundwa bya Bible Kebyendelelapo
KYOKWIKADILE NA MVUBU: Bantu bafwaninwe kwita pa dijina dya Yehova pa kusaka’mba bakapande. (Lo 10:13, 14) Inoko, ke muntupo ense witabija kwifunda Bible usakanga kwingidija misoñanya ya Yehova mu būmi bwandi. O mwanda twingidijanga senene kitatyi kyetu kilēme mu busapudi na kukwasha boba basaka kushinta na mutyima umo pa kusangaja Yehova. Shi muntu otwifundanga nandi Bible kendelelapo biyampe mu bula bwa kitatyi kampanda, i kya tunangu kumuleka ne kukakwasha boba bakokelwa na Yehova kwadi ne mu bulongolodi bwandi. (Yoa 6:44) Na bubine, shi muntu wakelombola mwenda mafuku bu udi na “mutyima muyampe wa kukamona būmi bwa nyeke,” tukasangela kwifunda nandi monka Bible.—Bil 13:48.
MWA KUMULEKELA:
-
Mufwije’ko pa kwitabija kwaitabije kwifunda bubine.—1Tm 2:4
-
Mulombole mvubu idi mu kwingidija byaefunda.—Luk 6:46-49
-
Wisambile nandi na kanye pa kyelekejo kya Yesu kya mukushi, ebiya umulombole abandaule kine kimulengeja aleke kwendelela.—Mat 13:18-23
-
Mushintulwile na bunwa kine kyowalekela kwifunda nandi
-
Muyukije amba usa kwanza kumupempula mu kyaba mu kyaba mwanda wa kumukankamika, kadi mulombole’mba mubwanya kukefunda nandi mwenda mafuku shi wasake kwendelela
TALAI VIDEO, KUPWA LONDOLOLAI BINO BIPANGUJO:
-
Le i bika byowefunda ku ino mīsambo bilombola’mba mwifundi kadipo wendelela biyampe ku mushipiditu?
-
Le musapudi wakwasha namani obefundanga nandi Bible etabije amba usakilwa kushinta?
-
Le musapudi washila namani obefundanga nandi mukenga wa kukefunda nandi monka Bible mwenda mafuku?