Dibuku Bitufundija Bible ne dibuku Bifundija Bible i meifwane. Bino bingidilwa bibidi bibadilwa mu bingidilwa byetu bya kufundija nabyo bubine bwa muswelo umo. Ino, dibuku Bitufundija Bible dingidijanga bishima bipēla kadi biluji. I dilupwilwe boba bakomenwa kwivwanija dibuku Bifundija Bible. Pa kyaba kya mbwejo, mu dibuku Bitufundija Bible mudi myanda idi ku mfulo ishintulula mu muswelo upēla bishima bimo ne milangwe idi mu misango. Mashapita keadipo na bipangujo bya ntwelelo nansha kapango ka kupituluka. Ino, i mafule na bubine bwa mu Bible mu kīpi bushintulwilwe mu misango. Pamo bwa dibuku Bifundija Bible, dibuku Bitufundija Bible nadyo dibwanya kupānwa mu kitatyi kyo-kyonso, nansha shi ke kwejipo wa kupāna’dyo. I muswelo’ka otubwanya kwingidija bino bipindi bya pa bula bidi mu dibuku Bitufundija Bible potwendeja kifundwa kya Bible?

MU KĪPI: Ku bantu bavule, manwa etu a kwendeja kifundwa na kutanga musango mu dibuku Bifundija Bible kupwa ke kwipangula kipangujo keendekangapo’tu. Fwatakanya’po bidi shi mwifundi kayukilepo biyampe ludimi’lwa nansha padi katañengapo senene. Shi bidi uno muswelo, ubwanya kutonga kwingidija dibuku Bitufundija Bible. Penepa, myanda ya shapita inenwe mu kīpi ibwanya kwingidijibwa bu pa kwimanina kifundwa kadi kankamika mwifundi akatange misango aye mwine. Bubine ne bubine bwa mu Bible bubwanya kufundijibwa mu kintu kya minite 15. Nansha mu myanda inenwe mu kīpi byokemudipo nshintulwilo yonso idi mu misango, ino mwadimu ufwaninwe kwiteakanya senene, koku utele mutyima ku bisakibwa bya mwifundi. Shi mwadimu wendejanga kifundwa mu misango, nabya myanda inenwe mu kīpi ibwanya kwingidijibwa bu ya kupituluka.

MYANDA YA KU MFULO: Bishima ne milangwe ya ku mfulo i bilonde mungya mobilondela mu misango. Mwadimu ubwanya kutonga shi ukesambila pa myanda ya ku mfulo mu dibuku Bitufundija Bible mu bula bwa kifundwa.