Tamba mu Kweji 9, mu Kabuku ka ku Kupwila Būmi ne Mwingilo mukatwejibwa musapwilo mupya wa kulondela’po unena’mba “Fundija Bubine.” Kitungo kyetu i kya kulombola bubine bwa kyalwilo bwa mu Bible, na kwipangula kipangujo ne kutanga kisonekwa.

Shi tubamone amba muntu wasangela musapu, tubwanya kwala kyalwilo kya kujokela’mo na kumushila kingidilwa kampanda, nansha kumutadija video ya pa jw.org. Tufwaninwe kulonga bukomo bwa kujoka mu mafuku matyetye mwanda wa kutamija kusangela kwandi pa myanda yotwesambile’po. Misapwilo mipya ne bya kulonga mwifundi bikemanina pa myanda inenenwe mu kīpi ya mu mashapita adi mu dibuku I Bika Bine Bifundija Bible? Kadi tukatana’mo bipangujo ne bisonekwa bikwabo biketukwasha mwakulongela kujokela’mo nansha kwendeja bifundwa bya Bible na kwingidija Bible kete.

Kudi’nka dishinda dimo kete ditwala ku būmi. (Mat 7:13, 14) Byotwisambanga na bantu ba mu bipwilo palapala ne babitamina bishileshile, tufwaninwe kulombola muntu ne muntu bubine bwa mu Bible bumusangaja. (1Tm 2:4) Shi tubayuka senene myanda palapala ya mu Bible ne kulumbulula manwa etu a ‘kwingidija kinenwa kya bubine mobifwaninwe’ nsangaji yetu ikavudila’ko, kadi tukabwanya kufundija bakwetu bubine.—2Tm 2:15.