Shi i mwana wetushitwila ku kibelo, tufwaninwe kumunena etwityile bambutwile bandi. Kulonga namino i kulēmeka bu mutwe bwabo. (Nki 6:20) Shi mwana wetunena tutwele, tufwaninwe kupela. Shi bambutwile bandi kebadi’kopo, tubwanya kujokela’ko kyaba kikwabo.

Shi mwana ke mutame’ko, padi kadi na myaka 10 ne musubu, nansha nankyo i biyampe kwisamba na bambutwile bandi. Shi kebadi’kopo, tufwaninwe kumwipangula shi bambutwile bandi i bamupe lupusa lwa kutonga bintu bya kutanga. Shi i bamupe’lo, tubwanya kumushila kitabo nansha kumulombola atwele pa jw.org.

Kitatyi kyotujokela nkasampe wasangedile musapu, tufwaninwe bidi kwisamba na bambutwile bandi. Kyotulongela kino, i mwanda wa kwibashintulwila kitungo kyetu kya kujokela’mo ne kwibalombola madingi a kamweno kadi akulupilwa a mu Bible atala pa bisaka. (Ñi 119:86, 138) Muswelo otumona bambutwile ne bulēme botwibalēmekele bukekala bukamoni buyampe kadi buketupa mukenga mukwabo wa kusapwila kisaka myanda miyampe.—1Pe 2:12.