Lelo umwene bantu badi pa kifwatulo’ba?— I ba Mateo, Mako, Luka, Yoano, Petelo Yakoba, Yude ne Polo. Abo bonso bāikele’ko mu kitatyi kimo na Yesu, kadi bālembele myanda ya Yesu. Tulondei lusango lwa bano bantu.

Mwādi batumibwa basatu bāsapwile pamo na Yesu. Le wibayukile?— I ba Mateo, Yoano ne Petelo. Ba Mateo ne Yoano i batumibwa bādi bayukile Yesu senene, kadi bālembele mikanda mudi myanda ya būmi bwa  Yesu. Mutumibwa Yoano wālembele ne mukanda wa Kusokwelwa ne mikanda isatu ya Yoano wa Kamo, Yoano wa Tubidi ne Yoano wa Tusatu. Mutumibwa Petelo aye wālembele mikanda ibidi ya mu Bible. Itelwanga’mba, Petelo wa Kamo ne Petelo wa Tubidi. Mu mukanda wandi wa bubidi, Petelo wālembele’mo ne myanda yānene Yehova aye mūlu kudi Yesu’mba: ‘Uno i wami mwana. Musenswe bikomo kadi netembanga’ye.’

Bantu bakwabo badi pa kifwatulo’ba nabo betufundija myanda ya Yesu mu mikanda yobāsonekele. Umo bidi i Mako. Mobimwekela wādi’po kitatyi kyobākwete Yesu kadi wēmwenine byonso byāmufikīle. Mukwabo i Luka. Wādi dokitele kadi bimweka bu wāikele ke mwine Kidishitu papo Yesu ke mufwe.

Balembi babidi bakwabo ba Bible badi pa kifwatulo’ba i bankasandya Yesu. Uyukile abo majina?— I ba Yakoba ne Yude. Kebāitabijepo mudi Yesu dibajinji. Kyaba kimo bādi balanga’mba wabela ne kabulubi. Ino mwenda mafuku, bāitabija mudi Yesu bāikala ke bene Kidishitu.

Mulembi wa Bible wa mfulo udi pa kifwatulo’u i Polo. Paādi kāikele mwine Kidishitu, bādi bamwita bu Solo. Wādi ushikilwe bene Kidishitu kadi wādi wibamwesha malwa. Le uyukile kyālengeje Polo etabije kwikala mwine Kidishitu?— Difuku dimo Polo wādi wenda mu dishinda, ino mu kitulumukila wāivwana kutamba mūlu muntu umunena. Uno muntu i Yesu! Wāipangula Polo’mba: ‘Mwanda waka umwesha malwa bantu bangitabije?’ Ino mīsambo’tu ipwa, Polo waālamuka ke mwine Kidishitu. Polo wāsonekele mikanda 14 ya mu Bible, tamba Loma kutūla ku Bahebelu.

Mwene’mba tutañanga Bible difuku ne difuku?— Twifundanga bivule bitala padi Yesu na kutanga Bible. Le usakanga kwifunda bivule bitala padi Yesu?—