Lelo ke bakulombole’po kamwanda kafyame?— * Bible wisambila pa kifibwe kya pa bula kitwa bu “kifibwe kikola.” I kikola mwanda i kitambe kudi Leza. Kadi bekitanga bu kifibwe mwanda bantu kebādipo bekiyukile. Ne bamwikeulu nabo bādi basaka kwikiyuka. Le nobe ukimba uyuke kino kifibwe?—

Leza wāpangile mwana-mulume ne mwana-mukaji umbajinji ke padi myaka mivule. Majina abo i ba Adama ne Eva. Leza wēbapele kifuko kiyampe, ke budimi bwa Edena kadi. Shi ba Adama ne Eva bākōkele kudi Leza, longa abo ne bana, baswile kwalamuna ntanda yonso ke paladisa’nka na mwādi mwikadile budimi bwa Edena. Badi ba kwikala nyeke mu Paladisa. Ino le uvulukile byālongele ba Adama ne Eva?—

Adama ne Eva bātombokēle Leza, o mwanda dyalelo ketudipo mu paladisa. Ino Leza wānene’mba ukalamuna ntanda yonso ikale miyampe, ne bantu bonso bakekale’mo nyeke ne nyeke kadi mu nsangaji. Le wadi wa kulonga kino namani? Mu bula bwa myaka mivule bantu kebādipo bekiyukile. Kyādi kifibwe.

Yesu paāile pano pa ntanda, wāfundije bantu bintu bingi bitala kino kifibwe. Wānene’mba i kifibwe kya Bulopwe bwa Leza. Yesu wālombwele bantu balombele mwanda wa buno Bulopwe bwiye. Bukalamuna ntanda ke paladisa ya dyangi.

Le nobe usangedile kuyuka kino Kifibwe?— Yuka’mba enka boba bakōkela Yehova bo bakekala mu Paladisa. Bible witulombola mānga mivule ya bana-balume ne bana-bakaji bākōkele Yehova. Le ukimba kwibayuka?— Leka tukulombole’ko bamobamo, tuyuke ne mwa kwibewila.