KIFUNDWA 8
Yoshia Wādi na Balunda Bayampe
Molangila, le i bikomo kulonga byoloke?— Momulangila bantu bavule. Bible witulombola amba nsongwalume umo witwa bu Yoshia, nandi wāmwene bu i bikomo kulonga byoloke. Ino wādi na balunda bayampe bāmukweshe. Ivwana pano lusango lwa Yoshia ne balunda nandi.
Shandya Yoshia i Amone, mulopwe wa Yuda. Amone wādi mutyani kutabuka kadi wādi utōta bankishi. Kitatyi kyāfwile Amone, Yoshia wāikele ke mulopwe wa Yuda. Inoko wādi ukidi’tu na myaka mwanda! Le ulanga’mba nandi wādi mubi bwa shandi?— Mhm, kādipo mubi!
Zefenia wādyumwine bantu baleke kutōta bilezaleza
Yoshia nansha ke paādi ukidi mwanuke bininge, wādi usaka’nka kukōkela Yehova. O mwanda wātongele kwikala mulunda’nka wa bantu basenswe Yehova. Nabo bākweshe Yoshia alonge byoloke. Le balunda bamo bidi ba Yoshia i bāni?
Umo bidi i Zefenia. Zefenia wādi mupolofeto wādyumwine bantu ba mu Yuda amba shi batōte bankishi, bakafikilwa na bibi. Yoshia wātejeje Zefenia, wātōta Yehova, kātōtelepo bankishi.
Mulunda mukwabo wa Yoshia i Yelemia. Wādi na myaka isenselela ku ya Yoshia, kadi kitatyi kyobādi batama bādi nyeke bapwane. Bādi bine balunda ne kitatyi kyāfwile Yoshia, Yelemia wāsonekele lwimbo lulombola’mba wādi usenswe Yoshia. Yelemia ne Yoshia bādi bekwasha mu kulonga byoloke ne kukōkela Yehova.
Yoshia ne Yelemia bādi bekwasha mu kulonga byoloke
Le kimfwa kya Yoshia kibakufundija bika?— Nansha ke paādi ukidi mwanuke mutyetye, Yoshia wādi usaka’nka kulonga byoloke. Wādi uyukile amba ufwaninwe kupwana’nka na bantu basenswe Yehova. Nobe ufwaninwe kutonga balunda basenswe Yehova ne bakakukwasha ulonge byoloke!
TANGA MU OBE BIBLE
Tala'po Bidi ne Bino:
DIBUKU DYAMI DYA MĀNGA YA MU BIBLE
Mulopwe Muyampe wa Mfulo wa Isalela
Aye ukidi nkasampe, Yoshia wālongele kintu kya bukankamane.
