Nabutwidilwe mu Acul, mu ntanda ya ngulu ya kushika kwa Guatemala. Kisaka kyetu i kya mu bantu betwa bu ba Ixil, batambile ku muzo wa ba Maya. Kutentekela pa lwetu ludimi bwa Kiixil, nadi ngyukile ne Kieshipanyole. Kubutulwa kwami kwaikele’ko mu kitatyi kyadi’ko divita dya basivile dyalongele myaka 36 mu Guatemala. Mu kine kitatyi’kyo bene Ixil bafwile.

Ponadi na myaka iná, tutu wami wa myaka isamba-ibidi waboile grenade pampikwa kuyuka yaladika. Kuladika kwayo kwansabile meso, ino bya bulanda, tutu aye kwamwipaya. Tamba papo, nakapityije būmi bwami bwa pa bwanuke ku masomo kobadi balamina bana bampofu mu Kibundi kya Guatemala, kwine konefundile bilembwa bya bampofu. Bendeji badi’ko, bampeleje kwisamba na banuke bakwetu kwampikwa ne kunombola bubinga, ne tamba papo baeleve bakwetu bashilula kungepa. Nalwile na bushiyena, kyaba kyonso mwaka ne mwaka, nadi ngabila kitatyi kya konje kibwane mwanda wa nkalonge myeji ibidi pamo na mama, aye wadi nyeke na kanye ne lusa. Ino bya bulanda, ponadi na myaka dikumi, mama nandi wafwa. Ñeni yamvutakene pa kuvuluka’mba najimija muntu umo kete pano pa ntanda wadi unsenswe.

Ponadi na myaka 11, najokēle mu kibundi kyetu kukashikata na tutu wa mu difu dikwabo pamo ne kisaka kyandi. Bankweshe na bisakibwa bya ku ngitu, ino i kutupu wabwenye kunkwasha mu malango. Kyaba kyonso, nadi’nka ndidila Leza’mba: “Mwanda waka mama wafwile? Mwanda waka byadi binomba kwikala mpofu?” Bantu badi banombola’mba bino byonso i kiswa-mutyima kya Leza. Nafudile ku kunena’mba Leza ke molokepo kadi udi na mutyima mūmu. Shi nkyetundikilepo i mwanda’tu nabudilwe bintu bya kwitundika nabyo.

Bupofu bwanzozekele ku ngitu ne mu ñeni. Pa bwanuke, najilwilwe na busekese misunsa mivule. Nkyadipo nsapula’byo—Mwanda nadi ngyukile amba i kutupu usa kwingivwana. Bantu kebadipo bavudile kwisamba nami, nami nkyadipo nesamba na muntu nansha umo. Nadi netolola kadi mutyumukwe mutyima, nkyadipo nkulupile muntu nansha umo.

Ponadi na myaka dikumi ne isatu, bantu babidi Batumoni ba Yehova (ba mulume ne mukaji) bamfwenene potwadi mu kitatyi kya kutūja ku masomo. Mwadimu umo wadi ungivwaninanga’ko lusa webanena bashilule kunangila. Nabo baiya ne kunsapwila byobya bilaile Bible amba bafwe bakasanguka kadi difuku dimo bampofu bakamona monka. (Isaya 35:5; Yoano 5:28, 29) Nasangedile byobya byobamfudije, inoko byadi bikomo kondi kwisamba nabo, mwanda nadi nkibidilepo kwisamba na bantu. Nansha byonadi muntu wikaka, baendelele kumpempula na kitūkijetyima ne kanye mwanda wa kumfundija myanda ya mu Bible. Bano ba mulume ne mukaji badi balonga makilometele 10 na kukanda ngulu mwanda wa kwiya mu kibundi kyetu.

Tutu wanombwele mobamwekela amba badi bantu bavwele biyampe, ino ke ba lupetopo. Nansha nankyo bantele mutyima bininge, ne kundetela tubyabuntu. Nanenene na’mba enka bene Kidishitu ba bine bo babwanya kwipāna nenki.

Nefundile Bible na bitabo bya mu bilembwa bya bampofu. Nansha mu ñeni byonaitabije amba yeu keye nefunda, inoko mu malango mwakidi bintu bimo byadi binkomene kwitabija. Kimfwa, nalwile pa kwitabija amba Leza untele bine mutyima, ne amba kudi bantu bewile Leza bakokeja nabo kunta’o. Naivwanije mwanda waka Yehova ukilekele mu kitatyi kampanda bubi, naijije pa kusaka mone Leza na bubine amba i Tata wa buswe. *

Byobya byonefundile mu Bisonekwa byashilwile kushinta bityebitye mulangilo wami. Kimfwa, nefundile amba Leza wivwaninanga lusa boba basusuka. Leza wānenene pangala pa batōtyi bandi bādi basusulwa amba: “Bine namone malwa a bantu bami . . . ndyukile biyampe masusu obasusuka.” (Divilu 3:7) Ponayukile ngikadila ya kanye ya Yehova, yantonwene mpāne būmi bwami kwadi. Kufika mu 1998, nabatyijibwa kendi Kamoni wa Yehova.

Mwaka umo na ponabatyijibwe, nakatanwa ku masomo a bampofu a kubwipi na kibundi kya Escuintla. Mukulumpe umo wa mu kipwilo kyetu wayukile makambakano onadi nao mu kibundi kyetu pa kukatanwa ku kupwila. Muyukile, kipwilo kya kubwipi kyadi bukila bwa ngulu mine yadi ipita’mo ba mulume ne mukaji badi befunda nami’ba, ne byadi bikomo kondi pa kwenda’ko. Uno mukulumpe waunkweshe na kunkimbila’ko kisaka kimo kya Batumoni mu Escuintla bakokeja kwitabija kuntundaila kwabo ne kunkwasha’mba ngikale ntanwa ku kupwila. Ne i bine, i bandele pamo’nka bwa mubutule wa mu kisaka kyabo.

Ngidi na bimfwa bivule bya buswe bwa bine bwanombwele banabetu mu kipwilo. Ino myanda yonso mu kikonge, i minkulupije amba byondi Kamoni wa Yehova, pano ngidi umbukata mwa bene Kidishitu ba bine.—Yoano 13:34, 35.

Pano nkikimonengapo bu wa bituputupu ne wampikwa lukulupilo. Būmi bwami pano budi na kitungo. Byondi mwingidi wa kitatyi kyonso mu mwingilo wa kufundija Bible wa Batumoni ba Yehova, ntanga mutyima bininge ku kufundija bakwabo bubine bwa mu Bible pa kyaba kya kuta’o pa bulema bwami. Kadi, ngidi na dyese dya kwingidila kipwilo bu mukulumpe ne kunena mīsambo ya mu Bible mu bipwilo bya konshikete. Naikele ne na dyese dya kunena mwisambo ku kitango kya ntanda kwine kwibuñanga tununu ne tununu twa bantu.

Mu 2010, nafundile ne Masomo a Bufundiji bwa Mingilo (etwa dyalelo bu Masomo a Basapudi ba Bulopwe) alongelwe mu El Salvador. Ano masomo ankweshe mwa kwingidila senene mwingilo wami mu kipwilo. Kufunda konafundile ano masomo kwanengeje mone amba bine Yehova Leza umwene na mvubu kadi unsenswe, Leza mwine upa bantu bukomo bwa kubwanya mwingilo wandi.

Yesu wānenene amba: “Nsangaji ya kupāna itabukile ya kupebwa.” (Bilongwa 20:35) Nkokeja kunena’mba dyalelo ngidi na nsangaji ya binebine; kadi nansha byonkyadipo nebifwatakanya mafuku kunyuma, pano mona bu mbwanya kukwasha bakwabo.