Mutangi Muswedibwe:

“Wiye unonde.” (Mako 10:21, Bisonekwa Bitokele) Na bubine, mungya bino binenwa, Yesu Kidishitu witwita batwe bonso tumulonde. Lelo usa kwitaba ku lwito lwandi? Shi witabe, būmi bobe busa kushinta binebine. Mwanda waka?

Yehova wātumine wandi Mwana wa bunka pano pa ntanda kupāna būmi bwandi bu kikūlwa. (Yoano 3:16) Kutentekela pa kwitufwila, uno Mwana wētulombwele ne mwa kwikadila. Wālamine bululame bwandi mu byonso byaādi ulonga, ne kusangaja wāsangaja Shandi ku mutyima. Kadi Yesu wētulombwele mwa kwiwila kimfwa kya Shandi. Mashinda ne kiswa-mutyima kya Shandi byāmwekele potō mu binenwa ne bilongwa bya Mwana.—Yoano 14:9.

Bible unena amba Yesu i “kitompekejo kya kumulonda [batwe] mu māyo andi.” (1 Petelo 2:21) Shi tukimba kufwena Yehova, shi tusaka kwikala na būmi buyampe dyalelo, ne shi tuswele kushala mu dishinda dya būmi bwa nyeke, nabya tufwaninwe kulonda mu mayo a Kidishitu.

Pa ku mulonda, tusakilwa kujingulula senene būmi bwa Yesu pano pa ntanda. Nanshi tufwaninwe kwifunda na katentekeji būmi bwa Yesu busekunwinwe mu Bible. Kulangulukila pa byānene Yesu ne byaālongele, ne kuyuka muswelo wa kumwiula mu binenwa ne bilongwa, kuketukwasha tumone biyampe mwa kumulondela.

Tulomba dino dibuku dikukwashe utamije buswe boswele Yesu ne Yehova. Kadi buno buswe bukutonone ulonde mu mayo a Yesu amba usangaje mutyima wa Yehova dyalelo ne nyeke na nyeke.