YEHOVA LEZA, pa kusaka kwitukwasha tuyuke Meshiasa, wāpele bapolofeto ba Bible bavule bukomo bwa mushipiditu mwanda wa balombole myanda palapala itala kubutulwa, mwingilo, ne lufu lwa uno Munyongolodi wālailwe. Buno bupolofeto bonso  bwa mu Bible bwāfikidile padi Yesu Kidishitu. I bupolofeto bwa binebine, butela’nka ne tumyanda tutyetutye. Kimfwa, imvwana bupolofeto butyetye’tu bwālaile myanda mikatampe ikalongeka pa kubutulwa ne pa bunkasa bwa Meshiasa.

Mupolofeto Isaya wālaile amba Meshiasa ukekala wa ku musuku wa Mulopwe Davida. (Isaya 9:7) Bine, Yesu wābutwilwe ku musuku wa Davida.—Mateo 1:1, 6-17.

 Mika, mupolofeto mukwabo wa Leza, wālaile amba uno mwana ukekala muledi ne amba ukabutwilwa mu “Betelema Efelata.” (Mika 5:2) Kitatyi kyābutwilwe Yesu, kwādi bibundi bibidi mu Isalela byādi bitelwa bu Betelema. Kimo kyādi kubwipi na Nazala kungala kwa ntanda, ino kikwabo kyādi kubwipi na Yelusalema mu Yuda. Betelema wādi kubwipi na Yelusalema ye wādi witwa pa kala bu Efelata. Bine, Yesu wābutwilwe mu kino kibundi enka mwālaile bupolofeto!—Mateo 2:1.

Bupolofeto bukwabo bwa mu Bible bwālaile amba Mwanā Leza uketwa “mu Edipito.” Yesu pāadi ukidi mwana mutyetye wāselēlwe mu Edipito. Heloda pa kufwa, wāitwa’mo, ne bupolofeto bwāfikidila.—Hosea 11:1; Mateo 2:15.

Mu tabulo idi pa  paje 200, bisonekwa bidi munshi mwa kamutwe ka mwanda kanena’mba “Bupolofeto” bilombola myanda palapala itala padi Meshiasa. Tubakulombe udingakanye’byo na bisonekwa bidi munshi mwa kamutwe ka mwanda kanena’mba “Kufikidila.” Shi ulonge namino, ukakomejeja’ko lwitabijo lobe pa kuyuka amba Kinenwa kya Leza i kya bine.

Pobandaula bino bisonekwa, yuka amba byobya bitela bupolofeto byāsonekelwe tutwa twa myaka kumeso kwa Yesu kubutulwa. Yesu wānene amba: “Byonso bisonekelwe pa mwanda wami mu Bijila bya Mosesa ne mu Bapolofeto ne mu Ñimbo ya Mitōto bifwaninwe kufikidila.” (Luka 24:44) Bine, monka mokokeja kumwena mu Bible obe, byonso byāfikidile—kamwanda konso ne katye!