Tala bidi uno mwanda: Tim pāta futu na balunda nandi, waela’yo bingi ibapomona dididisha dya mulondakani nabo.

Shi wadi amba abe ye Tim, wadi wa kulonga’po namani?

UDI NA BINTU BISATU BYA KUTONGA’PO KYA KULONGA:

1. Kunyema.

2. Kubepela mukwabo.

3. Kusapwila mulondakani byalongeka, ne kwitabija kufuta.

Ukokeja kwikala na mutyima wa kutonga Kipindi A. Ino kudi bubinga buyampe bwa kwitabijija kilubo kyobe​—kikale i kya dididisha dyopomwene nansha kikwabo.

1. Kyo kintu kiyampe kulonga.

   Bible unena’mba: “[Tusaka] kwiendeja kwampikwa budimbidimbi mu byonso.”​—Bahebelu 13:18.

2. Bantu bapēlelwanga kulekela muntu witabija bilubo byandi.

   Bible unena’mba: “Yewa upūtanga kujilula kwandi kakamonepo dyese, ehe; ino yewa usaba ne kwijiba’ko ukafwilwa lusa.”​—Nkindi 28:13.

3. Kiyampe kutabukidila, kisangajanga Leza.

   Bible unena’mba: “Mupupakane i wa munyanji kudi Yehova; ino kifibwa kyandi kidi ne balulame.”​—Nkindi 3:32.

Karina, wa myaka 20, watompele kufya shandi mukanda wa amande yaafutyile pa lubilo lwaapityije na motoka. Ino byamukomene kufya’o nyeke. Karina unena’mba, “Kintu kya mwaka pa kupita’po, Tata wasokwele mukanda’wa palembe dyami dijina. Byandetele makambakano!”

I bika byotwifunda ku kino kimfwa? Karina unena’mba: “Kufya bilubo kuvudijanga’tu’nka mambo. Ukafula’nka ku kufuta’o!”

Bible amba: “Batwe bonso tukukalanga divule dine.” (Yakoba 3:2) Kadi monka motwekimwena, kwitabija bilubo pa kubulwa kwija i kilomboji kya kwityepeja ne kutama.

I biyampe kadi ne kwifundila ku bilubo byobe. Mwana-mukaji umo witwa bu Vera wanene amba: “Monanga kilubo ne kilubo kyononga bu masomo amfundija mbwanye kuboila’ko ñeni mwa kukalongela dikwabo mu muswelo mwishile shi natanwa na mwanda’wa mwenda mafuku.” Tala muswelo okokeja kwifundila ku bilubo byobe.

Le ukalonga namani shi ubaone nkinga yowalombanga shobe?

• Kujokeja nkinga talala ne kulanga’mba shobe kasapo kuyuka.

• Kusapwila shobe monso mobyaikadilanga.

• Kusapwila shobe mobyaikadilanga na kulambika muntu mukwabo.

Le ukalonga namani shi ubapone ekizame mwanda kwefundilepo biyampe?

• Kutopeka’mba ekizame yadi mikomo.

• Kwitabija’tu amba i ami mwine wapona.

• Kutopeka mwadimu amba unshikilwe.

 Pano jokela ku mwanda wanenwanga ne kwitūla pa kyaba kya (1) shobe ne kya (2) mwadimu obe. Le shobe ne mwadimu obe badi ba kukumona namani shi ubaitabijanga bilubo byobe kwampikwa kwija? Le badi ba kukumona namani shi ubafindanga bilubo byobe?

Pano vuluka kilubo kyowalongele ku mwaka ne kulondolola ku bino bipangujo.

Le kyadi kilubo’ka? Walongele’po namani?

• Nekifīle.

• Nalambikile’kyo muntu mukwabo.

• Naitabije’kyo pampikwa kwija.

Shi wafīle kilubo kyobe, le pa kupwa weimvwene namani?

• Biyampe​—Nailwa’ko!

• Netopekele​—Nadi’tu mfwaninwe kunena bya bine.

Le i muswelo’ka muyampe owadi wa kupwa uno mwanda?

I bika byowefunda ku kyakyo kyobe kilubo?

Mwanda waka bamo bapelanga kwitabija bilubo byabo?

Shi nyeke ufya bilubo byobe, le bantu bakakumona namani, ino bakakumona namani shi witabija’byo?​—Luka 16:10.