LANGA’PO bidi shi mwana mwana-mukaji wasapwila inandi amba: “Eyo, nsa kwiya ku njibo shi tubapu’tu kutamba ku masomo.” Inoko aye washala ukaya na balunda nandi, ke mungya kala kasapwila inandi amba: “Pa kupwa kufunda, wetu mwadimu wanenanga amba shala bidi.” Lelo i byendele’mo kunena namino?—

Nansha kadi padi i mwana mwana-mulume usapwila shandi amba: “Aa, nkitelepo futu mu njibo.” Ino bikekala namani shi bine wadi watela’yo mu njibo? Lelo ke bibipo kunena amba nkitelele’mopo futu?—

Mufundiji Mukatampe wētusapwidile kintu kiyampe kulonga. Amba: ‘I biyampe kinenwa kyenu kyomunena’mba Eyo kikale enka Eyo, Ehe wenu nandi ekale Ehe; mwanda kintu kikwabo kyo-kyonso kya kutentekela’ko kitamba kudi yewa mubi.’ (Mateo 5:37) Lelo kyādi kisaka kunena Yesu pano i kika?—I kunena amba tufwaninwe kulonga byobya byotunena.

Mu Bible mudi lusango lumo lulombola mwanda waka i kipite  buya kunena bya binebine. Lunenena pa bantu babidi bādi betela’mba i bana ba bwanga ba Yesu. Ivwana mobyāikadile.

Yesu wafu, kubapite kubwipi kwa myeji ibidi, bantu bavule batamba kulampe abaiya mu Yelusalema pa mwanda wa masobo makatampe a Bayuda etwa bu Pentekosa. Mutumibwa Petelo wanena mwisambo utulumukwa mwaebasapwila bantu myanda ya Yesu wasangwilwe na Yehova mu bafwe. Uno i musunsa umbajinji wasapwila bantu bavule baile mu Yelusalema myanda itala Yesu. Pano kebasake bayukidile bivule bine. Le penepo, abalonga namani?

Abashala’mo mafuku mavule kupita obadi balangila. Ino kitatyi pa kupita, bamobamo umbukata mwabo lupeto lubebapu pwē, pano kebisakila bebakwashe mwa kupotela bidibwa. Bana ba bwanga ba mu Yelusalema abasake kukwasha bano beni. O mwanda mwine, bavule umbukata mwabo abapoteja bintu byabo ne kuleta lupeto kudi batumibwa ba Yesu. Penepa batumibwa nabo kebabanya lupeto’lwa ku boba babudilwe’lo.

Ananaisa nandi ne mukajandi Safaila, ba mu kipwilo kya bwine Kidishitu kya mu Yelusalema, abapoteja bwabo budimi. Kekudipo wibanene amba potejai’bo. I abo’tu bene batonga kupoteja’bo. Ino  kyobapotejeja’bo ke mwandapo wa kuswa kobaswele bano bana ba bwanga bapya ba Yesu. Na bubine, ba Ananaisa ne Safaila kyobasaka i bantu bebamone amba i bantu bayampe mpata, abo nanshi badi bingi. Penepo abakwata mulangwe wa kunena amba tusa kupāna lupeto lonso lukwashe bakwabo. Ino na bubine basa kukatūla enka kipindi kya lupeto inoko basa kunena amba abatūla lonsololo. Lelo ulanga’po namani?—

Ebiya, Ananaisa waiya kwimona na batumibwa. Webape lupeto’lwa. Ino na bubine, Leza uyukile amba kaletelepo lupeto lonso. Ebiya Leza wasokwela mutumibwa Petelo amba Ananaisa kanenenepo bya binebine pa wao mwanda.

Kwivwana Petelo amba: ‘Abe Ananaisa, le i bika byowalekela Satana kukulongeja uno muswelo? Budimi bwadi bobe. Wadi ukokeja kuleka kupoteja’bo. Kadi pa kupwa kwibupoteja, i abe mwine wadi ufwaninwe kutonga kya kulonga na luno lupeto. Lelo i kika kyonenena amba wi mulete lupeto lonso abe mulete kipindi bitupu? Nanshi pa kino, kwitubepelepo enka batwe, ino ubabepela Leza.’

Mwanda i musumininwe. Bine Ananaisa wabepa bubela! Byobya byaanena amba nalonga, kalongele’byopo. Wabepa’tu amba ye mwaalongela. Bible witusapwila mobyapityila kupwa pene’pa, amba: ‘Ananaisa pa kwivwana binenwa bya Polo, wapone panshi, wafwididila.’  Bine, Leza waipaya Ananaisa! Kupwa, abatambija umbidi wandi panja, abakamujika.

Kintu kya nsaa isatu pa kupita’po, Safaila nandi watwela. Kayukilepo kyokya kyafikila wandi mulume. Ebiya Petelo wamwipangula’mba: ‘Lelo banwe bonso bubidi mwapoteje budimi enka ku buno bungi bwa lupeto lomwetupa’lu?’

Safaila amba: ‘Eyo, twapoteje budimi’bwa enka’tu ku bwabo bungi bwa lupeto.’ Ino bine i bubela! Mu lupeto lobapoteje budimi i bafye’mo lumo. Penepo Leza waipaididila ne Safaila mwine.—Bilongwa 5:1-11

Lelo i ñeni’ka yotukaboila ku kyokya kyāfikīle ba Ananaisa ne Safaila?—Kitufundija amba Leza kaswelepo bambepai. Aye usaka tunena bya binebine mafuku onso. Inoko bantu bavule banenanga amba kubepa bubela i kuyampe. Le molangila babo bantu banenanga bya bine?—Lelo uyukile amba misongo, masusu, ne lufu bidi pano pa ntanda byonso byāikele’ko enka pa mwanda wa bubela?—

Vuluka, Dyabola wābepēle Eva, mwana-mukaji mubajinji. Wāmusapwila amba shi kukōkelepo Leza ne shi udye ku kipa kyākunene Leza amba kufwaninwepo kudya’ko kukafupo. Eva wāitabija kya Dyabola, wādya kipa’kya. Kadi Eva wādisha’kyo ne Adama mwine. Papo bāikala ke ba bubi, ne babo bana bene bonso badi ba kubutulwa bu ba bubi. Byobāikele ke ba bubi, o mwanda mwine bana ba Adama bonso bāsusukile ne kufwa. Le i muswelo’ka wāshilwile makambakano onso?—Āshilwile na bubela.

Nanshi ke kya kutulumukapo shi Yesu wānene amba Dyabola ‘i mbepai, ye enka shandya ne bubela bwine!’ Aye ye mubajinji kubepa bubela. Kitatyi kibepa muntu shi ani, shi ani, bubela, nabya walonga kyokya kyālongele Dyabola dibajinji.  Tufwaninwe kwikala na ino milangwe kitatyi kyonso kyotwikala na mutyima wa kusaka kubepa.—Yoano 8:44.

Le i kitatyi’ka kyoikalanga na mutyima wa kusaka kubepa?—Mwene i kitatyi kyolonga kintu kibi?—Padi ubwanya kulala kintu kampanda kwampikwa kusaka. Shi bakwipangula amba i ani uladile’kyo, le ukatela mwanenu amba ye uladile’kyo? Nansha ukanena amba ami nkiyukilepo ne mokyaladikilanga mwine?—

Le bikekala namani shi badi abakupe mwingilo wa kulonga ku njibo ino abe kupwile’opo? Lelo ukanena amba ubaingilanga’o onso, abe kupwa’o mpika?—Tufwaninwe kuvuluka Ananaisa ne Safaila. Basapwile ne bya bine’mo ne bya bubela monka. Leza wēbepaile mwanda wa kulombola amba i bibi.

Nanshi nansha tulonga shi bika, shi bika, tukabipija myanda nyeke shi twela’mo bubela, kadi ketufwaninwepo nansha kwisamba bya bine bityange na bubela. Bible unena’mba: “Mwisambe byabinebine.” Kadi monka’mba: “Kemukibepela bānwe bene, mhm.” Yehova unenanga bya binebine mafuku onso, witusakila netu tunene bya binebine.—Efisesa 4:25; Kolose 3:9.