N KULUPILE amba nobe witabije amba kudi bantu badi na lupusa, na bukata nansha na bukomo kumpita ami ne abe mwine. Le momwena abe, i ani witutabukile bukata?​—I Yehova Leza. Lelo wandi Mwana, Mufundiji Mukatampe nandi? Lelo nandi witutabukile bukata?​—Na bubine, i mwitutabuke bukata.

Yesu wādi wikele mūlu pamo na Leza. Aye wādi Mwana wa ku mushipiditu, nansha mwikeulu. Lelo Leza wālongele bamwikeulu bakwabo, nansha bana ba ku mushipiditu bakwabo?​—Eyo, wēbalongele midiyo ne midiyo. Bano bamwikeulu nabo betutabukile bukata ne bukomo.​—Mitōto 104:4; Danyele 7:10.

Lelo ukivulukile dijina dya mwikeulu wēsambile na Madia’wa?​—I Ngabudyele. Wāsapwidile Madia amba wandi mwana ukekala Mwanā Leza. Leza wātūdile būmi bwa wandi Mwana wa ku mushipiditu munda mwa Madia mwanda wa Yesu abutulwe bu kana ka lukeke pano panshi.​—Luka 1:26, 27.

Lelo witabije kino kingelengele? Le witabije amba Yesu wādi wikele pamo na Leza momwa mūlu?​—Yesu wānene amba wādi mūlu. Le Yesu wāyukile ino myanda namani? Eyo, paādi ukidi nkasampe, padi Madia wāmusapwidile byānene Ngabudyele. Kadi, mobimwekela Yosefa wāsapwidile Yesu amba Shandi mwine i Leza.

Ino Yesu pa kubatyijibwa, Leza mwine wānene’nka ne kunena Aye mūlu amba: ‘Uno i wami Mwana.’ (Mateo 3:17) Ne bufuku bukya ke kufwa kwandi, Yesu wālombele amba: “A Tata, pano  umpe ntumbo yo nadi nayo kwako kobe kalakala ne panopantanda pene kepaikele’ko.” (Yoano 17:5, MB) Bine, Yesu wālombele kwenda kukekala monka pamo na Leza momwa mūlu. Le wādi wa kukekala’mo namani?​—I enka shi Yehova Leza wamwalamuna monka bu muntu wa ku mushipiditu wambulwa kumweka, nansha bu mwikeulu.

Pano nsaka nkwipangule’ko kipangujo kimo kya mvubu. Lelo bamwikeulu bonso i bayampe? Le ulanga’po namani?​—Eyo, shako kwādi kitatyi kimo kyobādi bonso bayampe. Bādi bayampe mwanda i Yehova wēbapangile, ne kintu kyonso kyalongele i kiyampe. Ino kupwa mwikeulu umo wāalamuka ke mubi. Le wāalamukile namani?

Pa kutana kilondololwa, tujokele bidi ku kitatyi kyāpangile Leza mwana-mulume mubajinji ne mwana-mukaji mubajinji, ke ba Adama ne Eva kadi. Bantu bakwabo banenanga amba lusango lwabo i lwano bitupu. Inoko Mufundiji Mukatampe wādi uyukile amba i mwanda wa bine.

Leza paāpangile ba Adama ne Eva, wēbatūdile mu budimi bunengele, mu kifuko kitelwa bu Edena. Kyādi kyombe kya mityi ne banyema, eyo, yādi paladisa. Bādi ba kwikala mu Paladisa nyeke kadi na bana bavule, kisaka kikatampe. Ino bādi bafwaninwe kwifunda kintu kimo kya mvubu. Ketudi kala besambile pa kino kintu. Tutale bidi shi tukivulukile’kyo.

 Yehova wālombwele ba Adama ne Eva amba ku bipa bya mityi yonso ya mu budimi babwanya kudya’ko mobasakila. Ino kwādi mutyi umo okebādipo banenwe kudya’ko. Leza wēbalombwele kyādi kya kukebafikila shi badye’ko. Wānene amba: “Mwiko, kufwa ukafwanga.” (Ngalwilo 2:17) Le ba Adama ne Eva bādi ba kwifunda kintu’ka?​—

Bādi ba kwifunda kikōkeji. Bine, būmi bwimanine’nka pa kikōkeji kya kukōkela Yehova Leza! Ba Adama ne Eva kebādipo ba kunena’tu bitupu amba basa kumukōkela. Bādi bafwaninwe ne kwikilombola mu bintu byobādi balonga. Shi bākokele Leza, longa bālombwele amba bamuswele ne amba basaka ekale Mulopwe wabo. Namino bādi ba kwikala nyeke mu Paladisa. Ino shi badya ku mutyi’wa, kyādi kya kulombola bika?​—

Kyādi kya kulombola amba kebayukilepo kufwija’ko Leza pa mwanda wa byonso byaēbapele. Shi nobe wādi’ko, lelo longa wākōkele Yehova?​—Dibajinji, ba Adama ne Eva bādi bakōkele. Ino muntu umo wādi wibatabukile bukata wāongola Eva. Wāmufikija ku kuleka kukōkela Yehova. Le wādi ani?​—

 Bible unena amba nyoka wēsambile na Eva. Ino uyukile kala amba nyoka kabwanyapo kunena. Penepa wākokeje namani kunena?​—I mwikeulu umo wāmwekeje amba i nyoka wisamba. Ino na bubine i mwikeulu wādi wisamba. Mwikeulu’wa ye wāshilwile kulanga bintu bibi. Wādi kasake ba Adama ne Eva bamutōte aye. Wādi usaka balonde byanena. Wādi usaka ayate kitenta kya Leza.

Enka namino uno mwikeulu mubi watūla milangwe yampikwa koloka mu mutyima wa Eva. Kamunena kupityila kudi nyoka’mba: ‘Leza i mwimubepele. Kemukafupo shi mudye ku uno mutyi. Mukekala na ñeni’nka bwa Leza mwine.’ Shi wādi amba i abe, lelo longa wāitabije uno mwanda?​—

Eva wāshilula kwabila kintu kyokebāmupelepo kudi Leza. Wādya ku kipa kya mutyi mujidikwe. Kupwa wāpa’ko ne Adama mwine. Shako Adama kāitabijepo byānene nyoka. Ino kusaka kwaādi usaka kwikala pamo na Eva kwātabukile buswe bwaādi uswele Leza. Ebiya nandi wādya ku mutyi’wa.​—Ngalwilo 3:1-6; 1 Temote 2:14.

Lelo i bika byālupukile’ko?​—Ba Adama ne Eva bāikala bampikwa kubwaninina, bānunupa, ne kufwa bāfwa. Byobādi ke bampikwa kubwaninina, babo bana bonso nabo bāikala bampikwa kubwaninina ne kadi bānunupa ne kufwa bāfwa. Bine Leza kābepelepo!  Nanshi i kya bine kunena amba būmi bwimanine pa kumukōkela. (Loma 5:12) Bible witusapwila amba mwikeulu wābepēle Eva’wa witwanga bu Satana Dyabola, ne bamwikeulu bakwabo bāikele ke babi nabo betwanga bu bademona.​—Yakoba 2:19; Kusokwelwa 12:9.

Le pano ubayuka mwanda waka mwikeulu muyampe wāpangilwe na Leza wāalamukile ke mubi?​—Mwanda wāshilwile kulanga bintu bibi. Wāsakile ekale Umbajinji. Wādi uyukile amba Leza i munene ba Adama ne Eva babutule bana, ne amba usaka bantu bonso bamutōte aye. Dyabola usakanga bantu bonso baleke kukōkela Yehova. O mwanda mwine utompanga kutweja milangwe mibi mu mityima yetu.​—Yakoba 1:13-15.

Dyabola unenanga amba kekudipo muntu nansha umo uswele Yehova. Na bubine aye ulañanga amba abe ne ami ketuswelepo Leza ne amba ketusakilepo kulonga binena Leza. Aye ufwatakanyanga amba tukōkelanga Yehova enka shi bintu byonso bilongeka monka motusakila. Lelo bilanga Dyabola i bya bine? Le ye motwikadile?

Mufundiji Mukatampe wānene bya bine amba Dyabola i mbepai! Ino Yesu wālombwele patōkelela amba uswele binebine Yehova, mwanda wāmukōkele. Kadi Yesu kādipo ukōkela Leza enka mu bintu bipēla kete. Wādi ukōkele kitatyi kyonso, nansha ke kitatyi kyādi kimukoleja bantu bakwabo. Wādi ulamete kudi Yehova kufika’nka ne ku lufu lwandi. O mwanda mwine Leza wāmusangwile, wāmupa būmi bwa nyeke ne nyekeke.

Shi ke pano, le ukokeja kunena amba walwana netu mukatakata i ani?​—Bine, i Satana Dyabola. Lelo ubwanya kumumona?​—Nansha dimo! Inoko tuyukile amba udi’ko ne amba witutabukile bukata ne kadi udi na bukomo kwitupita. Nansha nankyo, le ani utabukile Dyabola bukata?​—I Yehova Leza. Nanshi tubayuka amba Leza ye ubwanya kwitukinga.