LELO i bika byosakanga kutabuka, i kwingila’ni nansha i kukaya?—Na bubine, kukaya ke kubipo. Bible unena amba mu Yelusalema mwādi mwa ‘kuyula bankasampe bana-balume ne bana-bakaji bene, bazua mu mikenza.’—Zekadia 8:5.

Mufundiji Mukatampe wāsangedile kubandila bana pobakaya. Paādi kaile pano panshi, wānene amba: “Nadi [na Leza] pabwipi bwa sendwe mwine mukata . . . kusepelela nyeke ku meso andi.” Ubajingulula amba Yesu wādi mwingidi wingila pamo na Yehova momwa mūlu. Ne paādi ukidi mūlu, wānene amba: ‘Bintu byonādi ndoelelwe byādi na bana ba bantu.’ Bine, enka motwefundile, Mufundiji  Mukatampe wādi usangela bya binebine muntu ne muntu, ne bana bene kumo.—Nkindi 8:30, 31.

Lelo ulanga amba Yesu nandi paādi mwanuke wādi ukayanga makayo?—Kepabulwe wādi ukayanga. Ino byaādi ‘mwingidi mwine mukata’ momwa mūlu, le wādi wingila ne pano panshi pene?—I amo, bantu bādi beta Yesu bu “mwana sendwe wa mbao.” Ino bādi kadi bamwita bu “sendwe wa mbao.” Le kino kishintulula bika?—Ko kunena’mba Yosefa, mwine wādi ulelele Yesu pamo’nka bwa wandi mwana, wāmufundije. O mwanda mwine Yesu nandi wāikele ke sendwe wa mbao.—Mateo 13:55, MB; Mako 6:3, MB.

Le Yesu wādi sendwe wa mbao wa muswelo’ka?—Byaādi sendwe mwine mukata momwa mūlu, le ulanga kādipo wa kwikala  sendwe wa mbao pano panshi?—Langa’po mwingilo wa bu sendwe wa mbao mowādi ukomene mu mine myaka’ya. Padi Yesu wādi wendanga kukateta mutyi, wēulala bibese, ebiya kaselela bibese’bya ku njibo, ne kupwa kalonga mbao mwanda wa kupunga nayo mameza, bityi nansha bibasa, ne bintu bikwabokwabo.

Le molangila Yesu wādi uloelelwe uno mwingilo?—Shi abe wādi upungila bantu mameza mayampe ne bityi ne bintu bikwabokwabo, mwene byādi bya kukusangaja?—Bible unena amba i biyampe muntu ‘kusepelela mu mingilo yandi.’ Mwingilo uletanga nsangaji yokubwanyapo kutana mu makayo.—Musapudi 3:22.

Na bubine, kwingila kulumbululanga ñeni ne ngitu yetu. Bana bavule bashikatyile’tu enka kutala televijo, kukaya makayo a video, kuta kalata nansha kisolo. Kino kibafikijanga ku kubaya bibi ne kuzoza, kadi kebekalangapo bine na nsangaji. Ne kadi kekudipo obasangaja nansha umo. Penepo i bika byotufwaninwe kulonga mwa kwikadila na nsangaji?—

Mu Shapita wa 17 wa kino kitabo, twefundile’mo amba kukwasha bantu bakwabo na kwibalongela bintu kuletanga nsangaji. (Bilongwa 20:35) Bible utela Yehova bu “Leza wa nsangaji.” (1 Temote 1:11, NW) Kadi, enka motwadi tubatangila mu Nkindi’mwa, Yesu wādi na ‘nsangaji nyeke’ ku meso andi. Mwanda waka Yesu wādi na nsangaji?—Aye mwine i mutele’ko bubinga bumo paānene amba: “Tata wingilanga ne pano pene ne ami nami mo monka.”—Yoano 5:17.

Pādi Yesu pano panshi, kāingilepo enka bu sendwe wa mbao mu būmi bwandi bonso. Yehova Leza wāmupele mwingilo wa pa bula wa kwingila pano pa ntanda. Lelo wiuyukile?—Yesu wānene amba: “Mfwanyinwe kusapula Myanda Miyampe ya Bulopwe bwa Leza . . . , mwanda e kyo kyantumine Leza.” (Luka 4:43, MB) Dimodimo Yesu paādi usapwila bantu, bādi bamwitabija, kupwa nabo kebasapwila bakwabo byaādi unena, pamo na mwālongele uno mwana-mukaji mwine Samadia omona pano’u.—Yoano 4:7-15, 27-30.

Le Yesu wādi witeleka namani pa kwingila uno mwingilo? Le molangila wādi usenswe kwiwingila?—Yesu wānene amba: “Bidibwa byami  i byonka bino’mba: Ngube kiswa-mutyima kya yewa wakuntuma, ne kumupwila mīngilo yandi.” (Yoano 4:34) Le usangelanga mpata kudya bidibwa byosenswe kutabuka?—Ne Yesu nandi mo monka, wādi usangela mwingilo wāmupele Leza.

Leza i mwitulonge mu muswelo wa kwikala na nsangaji shi tubefunde kwingila kaji kampanda. Unena amba i mupe muntu kyabuntu kya “kusepelela mu mingilo yandi.” Nanshi shi wifunde kwingila pokidi mwanuke pano, ukekala na nsangaji mikatampe mu būmi bobe bonso.—Musapudi 5:19.

Shako, kekunenapo amba mwanuke ubwanya kwingila mwingilo wa batame, inoko batwe bonso tubwanya kwingila mwingilo kampanda. Bambutwile bobe bakokeja kukengila bukile bukya mwa kumwena lupeto mwanda wa kisaka kikale na bidibwa bya kudya ne njibo mwa kwikala. Kadi, enka moyukile kala, ku njibo kudi mingilo mivule ya kwingila pa kusaka amba njibo ikale dyangi shē kadi mikombwe senene.

Le i mwingilo’ka okokeja kwingila ukekala bu dyese ku kisaka kyonso kituntulu?—Ukokeja kukwasha ku kaji ka kwala meza, kukenda masāni, kukela bityakuku ku kyala, kukomba molālanga, ne kupanga bintu byokayanga nabyo. Padi uloñanga’ko kala bintu bimobimo mu bino. Bine uno mwingilo i dyese ku kisaka.

Pano tutale mwikadile mwingilo pamo bwa uno bu dyese. Shi ubapu kukaya ufwaninwe kutūla byokaya nabyo’bya kufula. Molangila mwanda waka kulonga namino kudi na mvubu?—Kino kilengejanga njibo ikale nyeke na bukundwe, ne kadi kiketwepeja ku byaka. Shi kutalwilepo byobya byokaya nabyo, difuku kampanda inobe ukokeja kupityila’mo uselele bilēma wanyanta’ko kimo. Ukokeja kukukala ne kupona wetapa kilonda. Padi byamufikija ne kwenda ku lupitalo. Mwene kino kikekala kibi mpata?—Nanshi shi utūla bintu byokaya nabyo kufula kupwa kwa kukaya, i dyese ku bonso.

Kudi kadi mwingilo mukwabo ufwaninwe kwingila bana. Kimfwa, mwingilo wa kufunda masomo. Mufundanga ku masomo mwa kutangila.  Bana bamo bamonanga’mba kutanga i kuyampe mpata, ino bakwabo nabo amba i kukomo. Nansha shi kumweka bu kukomo ku ngalwilo, shi wayuka’byo kutanga senene ukekala na nsangaji. Shi ubayuka kutanga, kudi bintu biyampe bivule byokokeja kwifunda. Ubwanya ne kwitangila abe mwine Bible, dibuku dya Leza. Nanshi shi wingila mingilo ya ku masomo biyampe, i dyese dya binebine, mwene i amo?—

Kudi bantu bakwabo banyemanga mingilo. Padi nobe uyukile’ko bantu bamo banyemanga’yo. Ino Leza byawitulongele amba twikale twingila, tufwaninwe nanshi kufunda mwa kusangela’yo. Le Mufundiji Mukatampe wādi usangela mwingilo wandi namani?—Aye wādi umona kwingila pamo’nka bwa kudya bidibwa byasakanga. Ao mwine i mwingilo’ka waādi unenena’po?—I wa kusapwila bakwabo myanda ya Yehova Leza ne muswelo obabwanya kukekala na būmi bwa nyeke.

Kudi kintu kibwanya kwitukwasha twikale kusangela kwingila. Wiipangule amba, ‘Mwanda waka uno mwingilo ufwaninwe kwingilwa?’ Shi uyukile mvubu ya kintu kampanda, kikekala kipēla kwikilonga. Kadi nansha mwingilo wikale mukata nansha mutyetye, ingila’o biyampe byonka. Shi wingila biyampe, ukasepelela mwingilo wa makasa obe, pamo na mwāsepelele’o Mufundiji wetu Mukatampe.