MWENE bikusangajanga shi muntu kampanda wakulongela kintu kiyampe?​—Bine, ne bantu bakwabo nabo basangelanga kwibalongela kintu kiyampe. Batwe bonso tusangelanga’kyo. Mufundiji Mukatampe wādi uyukile kino, ne kadi wādi ulongela bantu bintu nyeke. Wānene amba: ‘Ami nkyaidilepo amba bañingidile mingilo, mhm, poso’mba ami nebengidile.’​—Mateo 20:28.

Batwe netu shi tusaka kwikala pamo bwa Mufundiji Mukatampe, le tufwaninwe kulonga bika?​—Tufwaninwe kwingidila bantu bakwabo. Tufwaninwe kwibalongela bintu biyampe. Kunena na bubine bantu bavule kebaloñangapo namino. Mwanda bavule baswele enka bakwabo bebengidila. Kyaba kimo balondi ba Yesu nabo bālangile uno muswelo. Muntu ne muntu wādi usaka kwikala mukatampe nansha wa bulēme kupita bakwabo.

Difuku dimo, Yesu wādi wenda pamo na bandi bana ba bwanga, ke balondi bandi kadi. Kupwa bākatwela mu kibundi kya Kapanama, kubwipi na Dijiba dya Ngadilea, bonso pa kimo bātwela mu njibo kampanda. Mwine’mwa Yesu wēbepangula kipangujo amba: “Lelo kyokya kyo mwadi mwipatenya mu dishinda i kika le?” Bātalala’tu nyā, mwanda bādi bāya  bepatanya mu dishinda basaka bayuke mukatampe umbukata mwabo.​—Mako 9:33, 34.

Yesu wāyukile amba ke biyampepo mwanā bwanga nansha umo ekale kwilangila bu mukatampe kupita bakwabo. Ebiya, pamo’nka na motwefundile’kyo kala mu shapita mubajinji wa kino kitabo, wāimikile mwana mutyetye umbukata mwabo ne kwibalombola amba bafwaninwe kwityepeja pamo’nka bwa mwana mutyetye’wa. Ino kebāboile’kopo ñeni. Penepa kumeso’tu kwa aye kufwa, Yesu wēbafundija bufundiji bumo bokebādipo mwa kwidilwa nansha dimo. Le i kika kyaālongele?​—

I kino, pobādi bakidya bidibwa, Yesu wāimana ku meza, wāvūla bisandi byandi bya pangala. Wāsela kipeta kya mbwija, wēpombeleja’kyo mu kifuka. Kupwa wāyata kyoilo, wāela’mo mema. Balondi bandi kebābudilwepo kutulumuka kyaādi usaka kulonga. Abo papo bamutala, Yesu kāpite ku muntu ne muntu, ubandama ne kwiboija ku maulu. Ebiya wēbapampula ku maulu na kipeta’kya. Langa’po’tu bidi! Shi nobe wādi’po, longa wālongele namani? Lelo wādi wa kumona’byo namani?​—

Balondi bandi kebāmwenepo amba i byendele’mo Mufundiji Mukatampe ebengidile mu uno muswelo. Bine byēbapwile bunwa. Inoko Petelo kāitabijepo Yesu amwingidile uno mwingilo wa kwityepeja. Ino Yesu mwine wānene amba kyādi kya mvubu engile’o.

Mu ano mafuku ketudipo na kibidiji kya kwioija ku maulu batwe bene na bene. Ino pādi Yesu pano pa ntanda kino kyādi kilongwa. Lelo uyukile kyobādi balongela nabya?​—I kino: mu ntanda yādi ikele’mo Yesu ne balondi bandi, bantu bādi bavwalanga bikwabilo nansha masandala ashiya mayo pululu. Ebiya pa kwenda mu dishinda dya luvumbi, mayo abo ādi atokana luvumbi tō. Koija muntu wiile kwimupempula luvumbi lwa ku maulu kyādi kilongwa kiyampe.

Ino mu dino difuku kekwādipo mwanā bwanga wa Yesu nansha umo wātalukile amba oije bakwabo ku maulu. Ebiya Yesu aye mwine wēboija’ko. Pa kulonga kino, Yesu wāfundije balondi bandi bufundiji bumo bukatampe. Byādi bibasakila baboile ñeni ku buno bufundiji. Netu dyalelo tufwaninwe kuboila’ko ñeni.

 Lelo uyukile ñeni yotukokeja kuboila’ko?​— Yesu pa kuvwala monka bisandi bya pangala, wāshikete pa kifuko kyandi ku meza, kāshintulula’mba: “Lelo umbayūka kyo nemulongela nankyo’kyo’ni, a? Bānwe muntelanga’mba: Mufundiji! kadi amba: Mfumwetu! i biyampe byo munenanga. Ami uno mo monka. Ino talaipo bidi byo nemwoīja ku maulu enu ami Mfumwenu​—ami Mufundiji​—kibemufwaninwa ne bānwe bene kwioīja ku maulu enu.”​—Yoano 13:2-14.

Mufundiji Mukatampe wālombwele pano amba wādi usaka balondi bandi bekale kwiingidila abo bene na bene. Kādipo wibasakila muntu ne muntu ekale wilangila’nka aye mwine. Kādipo usaka balange amba enka abo bo ba bulēme bafwaninwe kwingidilwa nyeke na bakwabo. Wādi usaka bekale na mutyima muyampe wa kwingidila bakwabo.

Mwene buno bwādi bufundiji buyampe?​—Lelo nobe ukekala bwa Mufundiji Mukatampe na kwingidila bantu bakwabo?​—Batwe bonso tufwaninwe kulongela bakwetu bintu kampanda. Kino kikebasangaja. Ino kupityidila, bikasangaja Yesu ne Shandi.

Kwingidila bantu bakwabo kekukomenepo. Shi ute’ko mutyima, ukamona bintu bivule byokokeja kwibalongela. Langa’po bidi: Lelo  kekudipo nansha kintu kimo kyokokeja kulonga mwanda wa kukwasha inobe? Uyukile amba inobe ukulongelanga abe ne bonso ba mu kyenu kisaka bintu bivule. Le kubwanyapo kumukwasha’ko?​—Mwene i kiyampe kumulomba amba nsaka nkukwashe’ko?

Padi ukokeja kuteakanya meza kumeso kwa kisaka kwiya kudya. Nansha kadi kisaka pa kupwa kudya ukokeja kutalula masāni adi adilwa’mo ku meza ne kupampula’po. Bana bamo belanga bya busala ku kyala difuku ne difuku. Kyonso kyobwanya kulonga shi kika shi kika, nabya i kwingila koingidila bantu bakwabo, pamo’nka na mwādi mulongela Yesu.

Lelo udi na bankasobe bokokeja kwingidila? Vuluka amba Yesu, Mufundiji Mukatampe, wāingidile nansha ke balondi bandi bene. Nobe ukeula Yesu na kwingidila bankasobe. Lelo ukokeja kwibalongela bika ne bika?​—Ubwanya padi kwibakwasha bayuke kutūla bintu byobakayanga  nabyo pa kifuko kyabyo shi abapu kukaya. Nansha kadi ukokeja kwibakwasha na kwibavwika. Pakwabo ukokeja kwibakwasha na kwibādila butanda bwabo. Ulanga i kintu’ka kikwabo kyokokeja kwibalongela?​—Shi wibalongela bino bintu bakakuswa, pamo’nka na mobādi baswedile Yesu kudi balondi bandi.

Ukokeja kwingidila bantu bakwabo ne ku masomo. Kimfwa bomufundanga nabo nansha mwadimu wenu. Shi muntu kampanda waponeja tuye nansha bitabo byandi, kikekala kiyampe kumuboila’byo. Padi ukalomba kubula ku tabulo nansha kulongela mwadimu wenu kintu kikwabo. Nansha ke kushitwila muntu mulango nako i mwingilo muyampe.

Kyaba kimo, tubwanya kwingidila bantu ino abo ne kwitufwija’ko kwine mpika. Lelo ulanga amba kino kifwaninwe kwitulekeja kulonga biyampe?​—Nansha dimo! Bantu bavule kebādipo bafwija’ko Yesu pa mwanda wa mingilo yandi miyampe. Ino kino kekyāmukankejepo kulonga biyampe.

Nanshi ketukilekai nansha dimo kwingidila bantu bakwabo. Tuvulukei Yesu, Mufundiji Mukatampe, ne kulonda nyeke kimfwa kyandi.