A Musapudi wa Bulopwe Muswedibwe:

FWATAKANYA’PO bwa abe udi mu kisaka kya Betele mu Brooklyn mu Dya Butano lubanga, mafuku 2 Kweji 10, 1914. Ushikete pa kifuko kyobe ku meza a mu kidīlo, mwilaije Tutu Russell afike. Amba mutale, mulango wa mu kidīlo ubashituka, Tutu Russell watwela. Mungya kibidiji kyandi wetūkija bityetye, kupwa waimuna na nsangaji kisaka kya Betele amba, “Mwakoma’poi bonso.” Kupwa, pa kyaba kya kushikata bukidibukidi ku mutwe wa meza, wakupila makasa andi ne kunena na bukomo musapu wa amba: “Bitatyi bya Bajentaila bibafule; ne mafuku a balopwe babo mene!” Kufya nsangaji kubakukomena—tamba kala wadi wilaije kino kitatyi! Abe ne bakwabo mu kisaka kya Betele mubakashila nkashi ya kusangela uno musapu muyampe.

 Pabapite kubwipi kwa myaka makumi tamba Tutu Russell unena bino binenwa bitenga mutyima. Le tamba pene’pa i bika bilongele Bulopwe? Kebibadikapo! Yehova, kupityila ku mpangiko ya Bulopwe, i mulumbulule ne kufundija bantu bandi, badi’tu tununu tubala-tunga mu 1914, ino dyalelo ke bapite pa midiyo isamba-ibidi ne kipindi. Le i binga byomwenine mu buno bufundiji?

Dyalelo twimvwananga divule banabetu banena’mba, “Dikalo dya Yehova dya mūlu dyendanga kumeso!” ne bino i bya bine. Ino bubine i buno amba, tamba mu 1914, dikalo dya mūlu dyelekeja kipindi kya mūlu kya bulongolodi bwa Yehova, dyendanga kumeso, ke matadi i lubilo, monka mwikilombwela dino dibuku shi widitange na katentekeji. Pa kusambakanya myanda miyampe ntanda yonso, basapudi ba Bulopwe i bengidije miswelo palapala, kubadila’mo majulunale, kujokoloka mu dishinda, bifwatulo, tulata twa kusapula nato, mafono, ladiyo, enka ne Entelenete.

Pano na bukwashi bwa Yehova, twi babwanye kulupula mabuku esambila pa Bible mu ndimi 670 ne kupita ne kupāna’o ku muntu ense kwampikwa kulomba lupeto. Bengidi ba kwituma i bakwashe ku kūbaka Mobo a Bulopwe, Mobo a Bitango, ne mobo a musambo mu matanda mashidimuke ne mu matanda malanda. Kadi shi kubapone kimpengele, batutu ne bakaka bapelakananga na buswe kukwasha boba badi mu kifuko kiponenwe na kimpengele, ne kwilombola bu ‘banababo mu malwa.’—Nki. 17:17.

Kitatyi kimo, bakulumpe ba bipwilo, ne balwana baikele ‘kulonga bubi mu dijina dya kijila,’ ino i mwanda ukomeja lwitabijo pa kumona’mba kyaba kyonso, bukomo bwabo bubi bwaalamukile ke bukwasha ku “kwendeja myanda miyampe kumeso.”—Ñim. 94:20; Fid. 1:12.

Tudi na nsangaji ya kwikala pamo nobe bu “bengidi . . . ba mu njibo.” Yuka’mba twimusenswe bininge. Tulomba’mba myanda idi mu dino dibuku ikukwashe usangele bininge kipyanwa kyobe kya ku mushipiditu.—Mat. 24:45.

Tambula lwimu lwetu, i batwe

Banabenu,

Kitango Kyendeji kya Batumoni ba Yehova