Banwe Basenswe Yehova:

Mwādi mu mwaka wa 1971. Boba batenwe ku Kitango kya Distrike kyadi na mutwe wa mwanda unena’mba “Dijina dya Leza” kyalongelwe mu uno mwaka’u, basangele pa kutambula mabuku mavule mapya. Pa ano mabuku i pesambilwe amba, “i kutupu muntu nansha umo wadi ulanga’mba kusa kutambulwa mabuku mavule namino.” Tutu umo wanenene pa dibuku dimo mu ano alupwilwe amba: “Ino i ntompejo’tu isangaja ya bintu bīya kumeso byoketwaikele nabyo kashā!” Lelo wadi wisambila pa dibuku’ka? I pa dibuku dya mu Angele dinena’mba, “Mizo Ikayuka’mba Ami Ne Yehova”—Muswelo’ka? Ino mwanda waka dino dibuku dyamuletele ino nsangaji? Mwanda mwadi nshintulwilo mijadikwe ya bupolofeto budi mu mukanda wa mu Bible wa Ezekyele—bupolofeto butala būmi bwa kumeso bwa bantu bonso.

Mu bula bwa myaka ya tamba kulupulwa kwa dibuku ‘Kuyuka Yehova,’ kibalwa kya bantu ba Leza kyavudile’ko bukidibukidi—kutamba ku kintu kya mudiyo umo ne kipindi kutūla ku midiyo mwānda ne kupita. (Isa. 60:22) Bano bengidi ba Yehova midiyo ne midiyo besambanga mu kikonge ndimi 900 ne kupita. (Zek. 8:23) Bavule kebaikele kashā na mukenga wa kwifunda dibuku dishintulula kamo ne kamo bupolofeto bwa ku bukomo bwa mushipiditu bwālembele mupolofeto Ezekyele.

Kadi, mu bula bwa makumi a myaka tamba 1 971, mwivwanino wetu wa bubine buvule bwa mu Bible i mutamine’ko bininge pamo’nka bwa kitōkeji kyenda kibaila’ko. (Nki. 4:18) Mu 1985 twashilwile kumona patōkelela muswelo utelelwe “mikōko mikwabo” bu boloke, balunda na Leza. (Yoa. 10:16; Loma 5:18; Yak. 2:23) Kupwa, mu 1995 twaivwanije musunsa mubajinji amba butyibi bwa mfulo bwa “mikōko” ne “bambuji” bukalongeka pa “kyamalwa kikatampe.” (Mat. 24:21; 25:31, 32) Buno bujadiki bonso bwaikele na lupusa pa mwivwanino wetu wa mukanda wa Ezekyele.

Mu ino myaka ya panopano, kitōkeji kyendelelanga na kubaila’ko. Tala bufundiji botwifundile ku byelekejo bya Yesu. Pano buno bufundiji buvule i bwivwanikwe senene shē mu ñeni ne mu mityima yetu. Byelekejo bivule mu bino, bifunkila pa binkumenkume bisa kulongeka panopano ponka pa kyamalwa kikatampe kifwena bukidibukidi’ki. Ne mwivwanino wetu wa bupolofeto bumobumo bwa mu mukanda wa Ezekyele nao i mujadikwe. Mu buno bupolofeto mubadilwa ne bwa Koka ne Makoka (shapita 38 ne 39), mwingilo wa mwana-mulume udi na kakibīko ka bwīno ka mulembi (shapita 9), ne musanza wa mikupa myūmu ne kubambakanibwa pamo kwa kyelekejo kwa bipindi bibidi bya mutyi (shapita 37). Bino bitōkeji byonso nabyo i bujadiki bwa byobya byalembelwe mu dibuku ‘Kuyuka Yehova,’ pano ke padi myaka.

Nanshi ke kya kutulumukapo shi bantu ba Yehova bavule baipangwile’mba, “Le i kitatyi’ka kyotukekala na kitabo kidi na nshintulwilo mijadikwe ya bupolofeto bwa Ezekyele?” Kitabo Butōtyi Butōka bwa Yehova—Mfulo Mfulō Bubajokejibwa! kyo akyo kidi na ino nshintulwilo. Posa kutanga mashapita akyo 22 ne kulangulukila pa byelekejo bilumbuluke bidi’mo, usa kutendela bukimbi bwa mushike bwalongelwe pa kwikiteakanya. Pa kujingulula kine kyētupedile Yehova mukanda wa Ezekyele, twalangulukile’po bininge ne milombelo ponka. Twabandawile na katentekeji bipangujo pamo bwa bino: Le mukanda wa Ezekyele wādi na bufundiji’ka ku bantu ba mu mafuku a Ezekyele ne udi na bufundiji’ka kotudi dyalelo? Le i  bupolofeto’ka bwisambila pa binkumenkume bya mu mafuku a kumeso? Le tufwaninwe kukimba myanda yo-yonso ya kala ne nshintulwilo yayo ya mu mafuku a kumeso mu bupolofeto bwa Ezekyele? Malondololo a bino bipangujo aleta mwivwanino mujadikwe wa uno mukanda wa mu Bible otusenswe batwe bonso kutanga.

Potanga mukanda wa Ezekyele tamba ku ngalwilo kutūla ne ku mfulo, usa kukwatwa nzuba pa kipindi kya mūlu kya bulongolodi bwa Yehova. Kadi na bubine, usa kutendela mbila ya peulu itūdile’ko Yehova mwanda wa boba badi mūlu ne boba badi panshi basaka kumutōta mu muswelo waitabije. Kitabo Butōtyi Butōka kisa kuningisha mutyima obe wa kufwija’ko pa byobya ke bilonge kala Yehova pa mwanda wa bandi bantu ne pa byobya byasa kwibalongela panopano ponka kumeso’ku. Usa kumona’mba kino kitabo kikomeneja bininge mitwe ya myanda ibidi. Mubajinji, pa kusangaja Yehova, tufwaninwe kumuyukidija bu Mubikadi wa Diulu ne Ntanda. Wa bubidi, tufwaninwe kutōta Yehova mu muswelo waitabije, na kwiendeja mu būmi bwetu kukwatañana na mbila yandi ya peulu.

Bine, tukulupile amba kino kitabo kikaningija kusumininwa kosumininwe kutōta Yehova mu muswelo upeja bulēme dijina dyandi dikatampe kadi dijila. Kadi tusaka’mba, kikukankamike utengele nyeke kitatyi kikayuka mizo yonso ku bukomo amba aye i Yehova.​—Ezk. 36:23; 38:23.

Tulomba Tata wetu wa buswe, Yehova, akwesele bininge polonga bukomo bwa kwivwanija mukanda waālembeje na mupolofeto Ezekyele ku bukomo bwa mushipiditu.