Tempelo ya mu kimonwa i mizunzulwe pa “lūlu lulampe bininge” (1). Le twi bazunzule butōtyi butōka, na kwibutūla pa kifuko kya peulu bininge mu būmi bwetu?

Lubumbu ludi kufulakufula (2), lwine lwādi lujokolokele tempelo pa bukata bwa kipindi kikatampe kya ntanda (3), lwituvuluja’mba ketufwaninwepo kuleka kintu nansha kimo kisubije butōtyi botutōta Yehova. Shi bintu, enka ne kyokya “kya bitupu,” bifwaninwe kutūlwa kulampe na butōtyi butōka, le mwiendelejo wa disubi ne wa busekese mu batōtyi ba Yehova dyalelo ke pepi!​—Ezk. 42:20.

Kamunonga katamba mu kipandulwe kya tempelo, kababaye ke munonga kadi ubaleta būmi ne bumeni pa ntanda (4). Tukesambila pa ano madyese mu Shapita 19 wa kino kitabo.

Bibelo bilampe bya panja (5) ne bibelo bya munda (9) bituvuluja’mba mbila ya Yehova ya peulu ya mu mwikadilo itala bonso bakatwela mu butōtyi butōka. Yuka’mba bibelo bya panja ne bya munda byonso bidi na bula bumo ne bukata bumo. Kino i kyendele’mo, mwanda bijila byoloke bilomba Yehova i bya muswelo umo ku bengidi bandi bonso, ekale badi na kyepelo’ka nansha bwino’ka mu byobalonga.

Byumba bya kudīla’mo (8) bituvuluja’mba mu kitatyi kya kala, bantu bādi babwanya kudīla pamo bitapwa byabo bimo byobādi baleta ku tempelo, pamo bwa abo badya byakudya na Yehova. I bishile na tempelo ya ku mushipiditu mwine mutōtela bene Kidishitu dyalelo, mwanda “kitapwa kimo” ke kilambulwe kala. (Bah. 10:12) Inoko, tulambulanga bitapwa bya mitendelo.—Bah. 13:15.

Ubwanya kumona myanda palapala itala bipimo bya mu kimonwa bu ivutakanya ñeni. Ino itufundija mwanda mukatampe: I kyeya kya amba mpango ya Yehova ya kujokeja butōtyi butōka i ya binebine, monka mwikadile bipimo byampikwa kwitupa kadi byambulwa kushintashinta. Nansha Ezekyele byākanenenepo amba wāmwene muntu mu kimonwa kyandi, i mulembe madingi masumininwe āpele Yehova babitobo, bamfumu, ne bantu. Bengidi bonso ba Leza bafwaninwe kukwatakanya mbila yandi myoloke.