Mu Ezekyele shapita 23, tutana’mo myanda ikunka mutyima ya kulupwilwa patōka kwa bantu ba Leza pa kubulwa kikōkeji kwabo. Mu miswelo mivule, uno shapita i mwiifwane na shapita 16. Pamo bwa musapu mubajinji wa mu uno shapita, shapita wa 23 wisambila pa bundumba bwa kyelekejo. Yelusalema i mutelwe bu nkasa, inoko Samadia bu kaka wandi. Mashapita onso abidi alombola muswelo wālondele uno nkasa kaka wandi mu bundumba, kadi aye wāmupita ne kumupita mu kulonga bibi ne mu busekese. Mu shapita 23, Yehova utela majina a bano bana na bana babidi bana-bakaji: Ohola mukulu, i Samadia, mwipata mwa bulopwe bwa Isalela bwa bisaka dikumi; Ohodiba nkasampe, i Yelusalema, mwipata mwa Yuda. *​—Ezk. 23:1-4.

Ano mashapita abidi adi na kwiifwana kukwabo. Padi kwiifwana kukatampe i kuno: Bandumba bashilula bu bakaji ba Yehova kupwa bamutomboka. Kadi, mudi mulao wa lukulupilo. Shapita 23 ushintulula’ko bityetye lukulupilo lwa bukūdi, ino ulombola myanda iifwene na idi mu shapita 16 panena Yehova amba: “Nkafudija mwiendelejo obe wa kiboja ne bundumba bobe.”​—Ezk. 16:16, 20, 21, 37, 38, 41, 42; 23:4, 11, 22, 23, 27, 37.

Mafuku kunyuma, mabuku etu adi anena’mba bano bana na bana babidi bana-bakaji, ba Ohola ne Ohodiba i muneneno wa bupolofeto ufunkila pa bipwilo bya kine Kidishitu ne kwilalulula kwa nkulupilo ya Katolika ne Mishoni. Inoko, kulangulukila’po ne milombelo ponka ne bukimbi i kukolomone bipangujo. Le kashā bipwilo bya kine Kidishitu ke bikale bu mukaja Yehova mu muswelo kampanda? Le byasambile nandi kipwano? Nansha dimo. Bipwilo bya kine Kidishitu kebyādi’kopo nansha ke mu kitatyi kyāikele Yesu bu nsenga wa “kipwano kipya” wa Isalela wa ku mushipiditu; kadi bipwilo bya kine Kidishitu kebyaikele kashā mu uno muzo wa ku mushipiditu wa bene Kidishitu bashingwe māni. (Yel. 31:31; Luka 22:20) Bipwilo bya kine Kidishitu kebyādi’kopo enka ne pāfwile batumibwa. Byāshilwile kwikala’ko mu myaka ya katwa ka buná Y.M. bu bulongolodi bwa bupondo kadi bwa disubi, bubundilwe na “biyombo bityani”​—bene Kidishitu ba bubela​—ba mu bupolofeto bwa Yesu butala ñano ne biyombo bityani.​—Mat. 13:24-30.

Kwishila kukwabo kukatampe i kuno: Yehova wāletele lukulupilo lwa bukūdi kudi Yelusalema ne Samadia bampikwa kikōkeji. (Ezk. 16:41, 42, 53-55) Lelo Bible uleta ne lukulupilo lwa uno muswelo pa bipwilo bya kine Kidishitu? Aa! Kebidipo na lukulupilo monka mwikadile Babiloni Mukatampe.

Nanshi Ohola ne Ohodiba ke munenenopo wa bupolofeto ufunkila pa bipwilo bya kine Kidishitu. Inoko, kwikala’ko kwabo kuleta kitōkeji pa kintu kya mvubu mpata: muswelo umonanga Yehova boba bemanina bya bubela dijina dyandi dijila ne mbila yandi itala butōtyi butōka. Bipwilo bya kine Kidishitu bidi na kiselwa kya pa bula kya mambo pa uno mwanda, mwanda bidi na bipwilo tununu na tununu bītela bu bimanine Leza wa bine. Kadi, bītelanga’mba Mwanā Leza muswedibwe, Yesu Kidishitu, i mwendeji wabyo. Inoko bifile bubine na kunena’mba Yesu ubadilwa mu Busatu Busantu ne na kuleka kukōkela musoñanya wandi wa patōkelela wa ‘kuleka kwikala ba ino ntanda.’ (Yoa. 15:19) Bipwilo bya kine Kidishitu pa kwiela nyeke mu butōtyi bwa bilezaleza ne mu myanda ya politike, i bīlombole patōka’mba nabyo bibadilwa mu “ndumba mukatampe.” (Kus. 17:1) Ne kutatana kwine mpika, bikapebwa mfuto imo yonka itengele umbikalo wa ntanda yonso wa bipwilo bya bubela!