KAPANGO KA BUFUNDIJI 16B
Kutompola ne Kubinza, Kutūla Kayukeno, Kulalakanya—Kitatyi’ka ne Muswelo’ka?
Kimonwa kidi mu Ezekyele shapita 9 kifikidilanga ne mu ano etu mafuku. Mwivwanino wetu wa muswelo usa kulongeka binkumenkume ubwanya kwitukwasha tulwe na mfulo ya ino ngikadilo ya bintu na kikulupiji
“Kutompola ne kubinza”
KITATYI’KA: Mu mafuku a mfulo, kumeso kwa kyamalwa kikatampe kushilula
MUSWELO’KA: Bantu ba mityima myoloke balombolanga na binenwa ne na bilongwa byabo amba bashikilwe bibi bilongeka mu ino ntanda. Bano bantu betabanga biyampe ku mwingilo wa busapudi, bendelelanga kuvwala bumuntu budi pamo na bwa Kidishitu, babatyijibwa bu kiyukeno kya kwipāna kwabo kudi Yehova, ne kukwatakanya banababo na Kidishitu na lulamato
“Kutūla kayukeno”
KITATYI’KA: Mu kitatyi kya kyamalwa kikatampe
MUSWELO’KA: Mwana-mulume udi na kakibīko ka bwīno ka mulembi welekeja Yesu Kidishitu kitatyi kyakāya bu Mutyibi wa mizo yonso. Boba ba mu kibumbo kikatampe bakatyibilwa mambo biyampe, nansha kutūlwa kayukeno bu mikōko, kine kilombola’mba bakapanda pa Amakedona
“Kulalakanya”
KITATYI’KA: Pa Amakedona
MUSWELO’KA: Yesu Kidishitu pamo ne bibumbo byandi bya divita bya mūlu, mwine mukabadilwa bamwikeulu ne ba 144 000 bakaludika nabo, bakonakanya fututu ino ntanda mibi ne kunyongolola batōtyi batōka ne kwibatweja mu ntanda mipya myoloke
