KAPANGO KA BUFUNDIJI 1A
Le Butōtyi I Bika?
Butōtyi bubwanya kushintululwa bu “kilongwa kya kulombola bulēme ne buswe kudi leza kampanda.” Mu Bible, mu ludimi lubajinjibajinji bishima byalamwinwe bu “butōtyi” bibwanya kuleta mulangwe wa muntu ulombola bulēme bukatampe, nansha kikōkeji kikatampe, ku bipangwa. (Mat. 28:9) Bino bishima bibwanya ne kufunkila pa kilongwa kya butōtyi kudi Leza nansha kilezaleza. (Yoa. 4:23, 24) Myanda īsambilwa’po yo ibwanya kukwasha pa kwivwanija bino bishima.
I enka Yehova kete, Umpangi kadi Mfumu wa Diulu ne Ntanda, ye otufwaninwe kutōta bunka bwandi. (Kus. 4:10, 11) Tutōtanga Yehova na kulēmeka bubikadi bwandi ne dijina dyandi. (Ñim. 86:9; Mat. 6:9, 10) Ino myanda ibidi—bubikadi bwa Yehova ne dijina dyandi—i mīsambilwe’po bininge mu mukanda wa Ezekyele. Kishima “Mfumu Mwinē Lupusa Lonso Yehova” i kitelwe misunsa 217 mu mukanda wa Ezekyele kete, ne binenwa “mukayuka’mba ami ne Yehova,” misunsa 55.—Ezk. 2:4; 6:7.
Inoko butōtyi bwetu ke mwiivwaninopo’tu; i butōtyi bwa binebine bumweka ne mu bilongwa. (Yak. 2:26) Potupānanga būmi bwetu kudi Yehova, tumulayanga’mba mu būmi bwetu bonso tukamukōkela bu Mubikadi wetu ne kulēmeka bininge dijina dyandi. Vuluka’mba Yesu wākwatañenye butōtyi na “mingilo ikola” mu kilondololwa kyandi ku ditompo dya busatu. (Mat. 4:10) Byotudi batōtyi ba Yehova, tudi na kipyupyu kya kumwingidila. * (Kup. 10:12) Twingidilanga Leza mingilo ikola kitatyi kyotwingila mingilo ikwatañene na butōtyi bwetu ne yoya ilomba kwipāna. I pamo bwa mingilo’ka?
Mingilo ikola idi mu miswelo mivulevule, inoko yonso i milēme kudi Yehova. Twingilanga mingilo ikola kitatyi kyotusapwila bantu bakwabo, potutanwa ku kupwila ku Njibo ya Bulopwe, ne potūbaka ne kulama bifuko byetu bya kutōtela’mo. Kadi twingilanga mingilo ikola, potulonga butōtyi bwa kisaka, potukwatakanya mwingilo wa kukwasha banabetu mu lwitabijo basakilwa bukwashi, potwingila ku bitango bu bengidi ba kwilanga, nansha kwingila ku Betele. (Bah. 13:16; Yak. 1:27) Shi butōtyi butōka kyo kintu kya mvubu mpata mu ñeni yetu ne mu mityima yetu, nabya tukengila “mingilo ikola dyuba ne bufuku.” Tusangelanga kutōta Leza wetu, Yehova!—Kus. 7:15.
