KAPANGO KA BUFUNDIJI 1B
Myanda Mikatampe ya mu Ezekyele
Mungya buluji, mukanda wa Ezekyele ubwanya kwabanibwa mu uno muswelo:
SHAPITA 1 KUTŪLA KU 3
Mu mwaka wa 613 Y.K., Ezekyele pādi na Bayuda mu bumisungi mu Babiloni, wamone bimonwa bya Yehova ne kupebwa mwingilo wa kunena bupolofeto ku Bayuda bashikete kubwipi na munonga wa Kebale.
SHAPITA 4 KUTŪLA KU 24
Pa bukata bwa mwaka wa 613 ne 609 Y.K., Ezekyele wasapula musapu wa bupolofeto utala dibajinji butyibi pa Yelusalema ne bantomboki badi’mo batōta bilezaleza.
SHAPITA 25 KUTŪLA KU 32
Kushilwila mu mwaka wa 609 Y.K., mwaka wāshilwile Babiloni kutēkela Yelusalema kasāla ka mfulo, musapu wa Ezekyele wa butyibi wāshilwile tamba ku Yelusalema kutūla ku mizo ya lwana yādi ibajokolokele—Amone, Edoma, Edipito, Moabu, Fidishitia, Shidona, ne Tyila.
SHAPITA 33 KUTŪLA KU 48
Kushilwila mu mwaka wa 606 Y.K., papo Yelusalema ne tempelo yandi bilēle mu masala ku tutwa na tutwa twa makilometele, Ezekyele wate mutyima ku musapu wa lukulupilo wa kujokejibwa kukunka mutyima kwa butōtyi butōka bwa Yehova Leza.
Nanshi mukanda wa Ezekyele i mulonde mungya mwilondela bitatyi ne myanda. Bupolofeto bwa konakanibwa kwa Yelusalema ne tempelo i bubadikile bupolofeto buvule bwa kujokejibwa kwa butōtyi butōka. Kino kidi na buluji, mwanda bupolofeto bwa kujokejibwa bulombola’mba butōtyi kebwākidi’kopo ku tempelo.
Kadi, bupolofeto bwa Ezekyele pa mizo ya lwana yādi ibajokolokele (shapita 25 kutūla ku 32) i butwejibwe pa bukata bwa musapu wa butyibi pa Yelusalema ne bupolofeto bwa kujokejibwa kwa butōtyi butōka. Mwifundi umo wa Bible unena pa mwanda wa musapu wa Ezekyele wa butyibi amba: “Uno musapu i mulonge nsambukilo miyampe ya binenwa bya bukalabale bwa Leza na lusa lwandi pa bantu bandi, mwanda mfuto ya balwana nabo ibadilwa mu kunyongololwa kwa bantu bandi.”
