1. I kika kyotufwaninwe kulonga pa kusangaja Leza?

PA KUPWANA na Leza kipwano kiloe, kya buswe, ketufwaninwepo kutenga kantu ka ku mutōtelo wa bubela. Tufwaninwe kulonda mutōtelo wabine. Dyalelo bantu midiyo kujokoloka ntanda balondanga’o.

2. I kwepi kukokeja kutanwa Batumoni ba Yehova, ne mwingilo wabo i mwingilo’ka?

² Bible wānene kyabine, amba batōtyi babine i “kibumbo kikatampe” kya bantu “batambile mu mizo yonso, ne mu bisaka byonso ne mu bantu, ne mu ndimi.” (Kusokwelwa 7:9) Batumoni ba Yehova baputuminanga mu kukwasha bakwabo mu matanda 235, amba nabo bayuke milongelo ya buswe ya Yehova ne byasaka kobadi.

3. Batumoni batōtanga ani, ne i butōtyi bwa miswelo’ka bobapelanga?

³ Batumoni ba Yehova bayukile amba Yehova ye Leza umo kete ufwaninwe kutōtwa. O mwanda bapela kufukatyila bilezaleza nansha bifwatulo bya mu mitōtelo. (1 Yoano 5:21) Kebalēmekangapo bafwe na kulāla ntanda nansha na kupita mu mishole itembaulwa mu nkulupilo ya mu mitōtelo ya bubela ne mu “mfundijo ya bademona.” (1 Temote 4:1) Inoko baseñanga boba bafwilwa bakena babo na kwibashintulwila mulao wa Leza unena amba kudi lusangukilo lwa bafwe mu paladisa pano pa ntanda.​—Yoano 5:28, 29; Bilongwa 24:15.

4. Bantu ba Leza badi na mwimanino’ka pa myanda itala majende?

⁴ Batumoni kebateñangapo ku majende, ku bukinda, nansha ku bufwityi, mwanda bayukile amba bino byonso i bya Dyabola. Kebakulupilepo kukingwa na majende​—bakulupile mudi Yehova.​—Nkindi 18:10.

5. Batumoni ba Yehova ‘ke ba ino ntandapo’ mu muswelo’ka?

⁵ Yesu wānene amba bandi bana-babwanga ‘ke ba ino ntandapo.’ (Yoano 17:16) Yesu aye mwine wāpelele kutweja mutwe mu bya mapolitike bya mu yabo myaka’ya. (Yoano 6:15) Ne Batumoni nabo mo monka, kebekujangapo mu bya mapolitike, bya kufwila yabo ntanda, nansha bya bitenta bya ino ntanda. Inoko basonkanga musonko, ne kukōkela ku bijila bya ntanda yobashikete’mo.​—Yoano 15:19; Loma 13:1, 7.

6. I misoñanya’ka ilondanga bengidi ba Leza mu myanda ya busongi ne dilubu?

⁶ Batumoni balembejanga busongi bwabo ku Leta, mwanda bakōkele ku buludiki bwa bambikavu. (Tetusa 3:1) Bakōkele ku buludiki bwa Leza, o mwanda kebasoñangapo bakaji bavule. (1 Temote 3:2) Kadi, bengidi ba Leza kebavudilepo kwilubula mu masongi abo, mwanda balondanga misoñanya ya Bible mu būmi bwabo.

7. Lelo Batumoni balombolanga namani buswe bobeswele abo bonso?

⁷ Batumoni beswele abo bonso. Buno buswe, kutentekela’po ne buswe bobaswele Leza, bo bwibakutyile umbumo mu bu bana na bana bwabine, nansha byobalupukile mu tubila ne mizo mishileshile. Kitatyi kiponanga bimpengele nansha mu bitatyi bya bufudile, Batumoni bapelakananga kukakwasha bakwabo. I byabine, Batumoni balombolanga buswe mu būmi bwabo.​—Yoano 13:35.

8. I milongelo’ka mibi ipelanga kulonda bantu ba Leza?

⁸ Bantu ba Yehova baloñanga buninge bwa kwikala na būmi bwakubulwa budimbidimbi, būmi boloke. Bapela kwiba, kubepa, busekese, bunkolwankolwa, ne milongelo ya budimbidimbi mu myanda ya lupeto. Balume kebakupilangapo babo bakaji. Bamo, kumeso kwa kwikala Batumoni, bādi balonga bino bintu, ino na bukwashi bwa Yehova, abaleka’byo. Ku meso a Leza ke ‘boijibwe.’​—1 Kodinda 6:9-11.

9. Lelo dibuku dimo i dinene bika pa bipwilo bya mu Afrika bisama mushipiditu?

⁹ Eyo, ba mu mitōtelo mivule betelanga amba badi na bubinebine. Bafunka mingilo mikatakata yobengila amba yo ibingija byobanena. Kifwa, pa mwanda utala bipwilo bitelwa amba i bipwilo bya mu Afrika bisama mushipiditu, dibuku dimo dinena’mba: “Pa kyaba pādi ba majende ne ba manga pabapingakena bininge [bisumpi bipya bya bwine Kidishitu]. . . . Betela bu balombi balonga bingelengele. Bapolofeto umbukata mwabo bamona bimonwa ne kushintulula bilotwa. Bengidija mema masanto, māni ajila, buto, mabuji, ne binunka biya pa kubelula babela ne kushīka bantu ku misongo.”

10, 11. I kika kinenenwa amba bino bitelwa bu bingelengele kebilombolapo amba mutōtelo obilongwa’mo i wa Leza?

¹⁰ Ba mu ino mitōtelo banena amba bingelengele bilombola amba mutōtelo wabo i mweselwe na Leza. Ino bino bitelwa bu bingelengele kebilombolapo amba mutōtelo obilongwa’mo i mwitabijibwe na Yehova. Satana upanga batōtyi ba bubela bamo bukomo bwa kulonga “byabukomo.” (2 Tesalonika 2:9, MB) Ne kadi, Bible wānene kala amba byabuntu bya bingelengele bya kwa Leza, kifwa kunena bupolofeto, kunena mu ndimi, buyuki butabuke’mo, byādi ‘bya kufundulwa’ko.’​—1 Kodinda 13:8.

¹¹ Yesu wādyumwine amba: “Ke bonsololopo bantu bakuntela’mba; Mfumwami! Mfumwami! bakatwele umbulopwe bwa mūlu, ehe, poso enka wakulonga kiswa-mutyima wa Tata udi mūlu. Mu dyodya difuku bangi bakanena’mba; Abe Mfumwetu! Abe Mfumwetu! ketwadipo tufumika mu dijina dyobe, a? Kadi mu dijina dyobe ketwadipo tupanga bademona, a? Kadi mu dijina dyobe ketwadipo tulonga byonka bikata? Ino nami nkebatentulula’mba: Mhm! Ami nkimuyūkilepo, mfundukei papo bānwe bakulonga bubi.”​—Mateo 7:21-23.

12. I bāni bakatwela mu Bulopwe bwa mūlu?

¹² Penepo i bāni bakatwela mu Bulopwe bwa mūlu? I boba balonga kiswa-mutyima kya Yehova.

13. I mwingilo’ka upēne Leza kudi bantu bandi dyalelo, ne i bāni bengilanga’o?

¹³ Kiswa-mutyima kya Leza ku bantu bandi lelo i kiswa-mutyima’ka? Yesu wānene amba: “Myanda Miyampe ino’i ya Bulopwe ikasapulwa panopantanda ponso, amba ikale bu kiyukeno ku mizo yonso, penepa mfulo keifika shayo.” (Mateo 24:14, MB) Uno o mwingilo wingilanga Batumoni ba Yehova na bupyasakane.

14. Bulopwe bwa Leza i kika, ne i bāni bakabikala mu buno Bulopwe?

¹⁴ Kujokoloka “panopantanda ponso,” Batumoni ba Yehova basapulanga Bulopwe bwa Leza, umbikalo wa mūlu ukabikala pano pa ntanda ponsololo mu boloke. Bafundija amba Yehova ke mutonge kala Kidishitu Yesu bu Mulopwe wa buno Bulopwe, pamo ne babikadi nandi 144 000 basañwinwe mu bantu ba ntanda yonso.​—Danyele 7:14, 18; Kusokwelwa 14:1, 4.

15. Lelo buno Bulopwe bukonakanya bika?

¹⁵ Batumoni bengidijanga Bible, balombola bantu amba Bulopwe bwa Leza bukonakanya ngikadilo yonsololo ya Satana. Mutōtelo wa bubela ukajimina jimejime pamo ne mfundijo yao ifutulwija Leza, itumbija’ko Dyabola! (Kusokwelwa 8:8) Ne imbikalo yonso ya bantu ilwa na Leza nayo ikafundulwa’ko!​—Danyele 2:44.

16. I bāni bakekala babikalwa ba Kidishitu Yesu, ne bakekala kwepi?

¹⁶ Ne kadi, Batumoni ba Yehova bayukijanga bantu amba Kidishitu Yesu ukaleta byabuyabuya bya kutendelwa ku bantu bonso balonga bisaka Leza. Bakekala babikalwa bandi pano pa ntanda. Bible ulaya’mba: “Aye ukanyongolola mupando pa kwita; ne balanda ba kubulwa wakwibakwasha. Ukebafwila lusa balanda ne badi makasa, kadi ne myuya ya badi makasa ukeīpandijanga.”​—Mitōto 72:12, 13.

17. I bāni kete basapulanga Bulopwe bwa Leza?

¹⁷ Kekudipo kisumpi kya bantu kingi kilonga kiswa-mutyima kya Leza kya kusapula myanda miyampe ya Bulopwe. I enka Batumoni ba Yehova kete bo abo bayukijanga bantu Bulopwe bwa Leza kujokoloka ntanda yonsololo.