1, 2. I kifwa’ka kilombola amba kufwaninwe kwikale kintu kitabije bantu bonso mu myanda ya mutōtelo?

IMUSWELO’KA otukafikila pa kuyuka Leza? Le bilomba’nka poso tubandaule bufundiji bonso bwa mitōtelo ivudile nenki? Bine kebibwanikapo. Nansha shi bibwanika, tukayuka namani amba bobu bo bufundiji boloke?

² Na bubine, kudi milangwe mivule itala padi Leza, o mwanda kitusakila kuyuka i yepi yabine, kintu kitabijibwe na bonso. Tulete kifwa: Langa’po shi bantu bepatanya mu nsoko pa mwanda wa bula bwa kisandi. Mupoteji amba kidi na byadi bisatu, aye mpotyi amba i kīpi, kekifikapo pa byadi bisatu. Ino myanda ibwanya kupwa namani? I na kupima kisandi.

3. I kika kyālembēlwe Bible?

³ Lelo kudi kintu kitabije bantu bonso kya kuyukila’po mutōtelo? Eyo, kidi’ko, i Bible. Leza wālembeje Bible amba bantu ba pi na pi bayuke bubinebine butala padi aye. Ke mutampwe makopi midiyala ne midiyala. Ke mwalamunwe, aye yense nansha bipindi, mu ndimi 2 100 ne musubu. Kisengele muntu yense ukokeja kutanga bubinebine butala padi Leza mu lwabo ludimi.

4. I myanda’ka idi mu Bible?

⁴ Bible i kyabuntu kilēme kitupele Leza. Ushintulula bintu byoketwadipo ba kuyuka shi twadi amba ketudipo nandi. Ulombola myanda ya boba badi mu kīkalo kya mishipiditu. Witusokwela milangwe ya Leza, bumuntu bwandi, ne mpango yandi.  Ulombola mwaikadilanga na bantu mu bula bwa myaka tununu ne tununu. Wisambila pa bintu bikalongeka kumeso. Kadi ulombola ne muswelo otukokeja kusokola dishinda ditwala ku būmi bwa nyeke.

5. I kifwa’ka kilombola amba Bible i mukwatañane na sianse?

⁵ Kudi buluji buvule botufwaninwe kukulupidila amba Bible i Kinenwa kya Leza binebine. Buluji bumo i buno: Bible i mukwatañane na sianse. Mu myaka ya kala, bantu ba ntanda yonso bādi balanga amba ntanda i mitūlwe pa kintu kampanda. Kifwa mu Afrika wa Kupona, bantu bādi bakulupile amba ntanda i mikwatwe na nyoka mwitonte mapindi (maolo), mapindi 3 500 pangala pa ntanda, makwabo 3 500 munshi. Ino shi tukwatañanye na sianse, mulembi wa Bible wālembele myaka 3 500 ne musubu kunyuma amba Leza “ukobeka ntanda patuputupu.”​—Yoba 26:7.

6. I buluji’ka bwine bukatakata bulombola amba Bible i mutambe kwa Leza?

⁶ Buluji bwine bukatakata buyukanya amba Bible i mutambe binebine kudi Leza i myanda mibwaninine idi’mo ilombola bya kumeso. Leza kadipo bwa babwana-vidye, mwanda aye uyukanga bya kumeso; kadi byonso byanena bifikidilanga.

7. I bupolofeto’ka bumobumo bwa Bible bwāfikidile pa kala?

⁷ Bupolofeto buvulevule bwa Bible bwāfikidile mu myaka ya kala. Kifwa, Bible wābadikile kunena pakubulwa kwitupa, myaka 700 kumeso, amba Yesu ukabutwilwa mu kibundi kya Betelema, ebiya byālongeka enka nabya. (Mika 5:2; Mateo 2:3-9) Kutentekela pa bupolofeto bukwabo buvulevule butala padi Yesu, Bible wālaile kadi amba Yesu ukabutulwa na mwana-mukaji mujike, kupwa ukabwa ku bibese 30 bya ndalama. Buno bupolofeto bonso bwāfikidile. Bine, kekudipo muntu wādi wa kubwanya kubadikila kulombola bino bintu!​—Isaya 7:14; Zekadia 11:12, 13; Mateo 1:22, 23; 27:3-5.

8. I bupolofeto’ka bumobumo bwa Bible bufikidilanga dyalelo, ne byonso bino bilombola kika?

⁸ Bupolofeto buvule bwa Bible bufikidilanga mu kino kyetu kitatyi. Tulete kifwa:

• “Muzo ukatamba muzo mukwabo, kadi bulopwe bukatamba bulopwe bukwabo. Kadi ne kutenkana kukatampe kwa  nshi, ino kadi kukēkalanga kungi kungi konso bipupo bya nzala.”​—Luka 21:10, 11.

• “Bubi bwa kujilula bijila” bwālailwe amba bukavudila’ko.​—Mateo 24:12.

• “Mu mafuku a mfulo . . . bantu bakekala beswe abo bene, baswe lupeto, . . . bambulwa kukōkela bambutwile, . . . bambulwa kwīfula, babilobolobo, bambulwa kuswa buyampe, . . . bayule mitatulo, baswe kwisangaja pa kyaba kya kwikala baswe Leza.”​—2 Temote 3:1-5, NW.

Mwene nobe uyukile amba bino byonso bilongekanga dyalelo? Bubine bwa Bible ne kubulwa kwitupa kwa bupolofeto bilombola amba ke dibukupo’tu bitupu bwa mabuku makwabo. Bine i Kinenwa kya Leza kya ku bukomo bwa mushipiditu!​—2 Temote 3:16.

9, 10. I kika kilombola amba Leza kalekangapo bantu bashinte Bible?

⁹ Tulete kifwa, wi mwinē sosiete, ubalembe mulongo wa mbila ya kulonda bengidi bobe. Ino walwana nobe umo waiya washinta byowadi ulembele, usa kulonga’po namani? Mwene ukalemununa byobya byashintwa? Ne Leza nandi mo monka, kalekangapo bitupu bantu bashinta bubinebine bwa Bible, Kinenwa kyandi.

¹⁰ Boba batompanga kushinta bufundiji bwa Kinenwa kya Leza bakankalwanga. Shi tudingakanye Bible otudi nandi dyalelo na makopi a Bible a pa kala, i bimo byonka. Kino kilombola amba Bible kashintyilwepo tamba myaka ne myaka.