1. I butongi’ka bufwaninwe kutonga bantu dyalelo mu myanda itala butōtyi?

YESU wānene amba: “Yewa kalamatepo ko ndi i kinkwa nami.” (Mateo 12:30, MB) Shi ketudipo ku mutamba wa Yehova, tudi ku wa Satana. Kisengele bantu bonso balañanga amba bengidilanga Leza mwasakila, ino Bible unena amba Satana i “ñongoji wa panopantanda ponso.” (Kusokwelwa 12:9) Bantu bavule bakulupile amba batōtanga Leza, abo nanshi obengidila i Satana Dyabola! Bantu dyalelo banenwe kutonga: Kwingidila Yehova, “Leza wa bubinebine,” nansha Satana, “shandya bubela.”​—Mitōto 31:5, NW; Yoano 8:44, MB.

2. I muswelo’ka umo ukimbanga Satana kujikila bantu mashinda a kutōta Yehova?

² Kutonga kwingidila Yehova Leza i butongi buyampe, bo butongi bufikija ku kwitabijibwa nandi. Ino Satana kasangelangapo bantu bengidila Leza, aye mwine bo bandi bapwila mpumpu. Muswelo umo bidi waebasusulanga i na kwibakolomwena tufutululo ne kulondwalondwa na bakwabo, enka ne na balunda nabo, ne na ba kisaka. Yesu wādyumwine amba: “Muntu ukashikibwa’nka na ba mu njibo yabo.”​—Mateo 10:36.

3. Shi ba mu kyenu kisaka nansha balunda nobe bapela butōtyi botōta Leza, lelo usa kulonga’po namani?

³ Shi ye mobakulongelanga ne abe, le uloñanga’po namani? Bantu bavule bayukile amba dishinda dyobadi’mo i dibi, ino batyina kulupuka’mo. Amba i kulubila kyabo kisaka. Le kulanga namino i kwendele’mo? Shi ubaivwana lupupuji amba ba mu kyenu kisaka betondanga bitomibwa bileta  kyaka, lelo kukebadyumunapo amba byabyo bitomibwa bikemuletela lufu? Abe kukasupo kutoma nabo bitomibwa’bya, ke amopo?

4. Yoshua wānene bika pa butōtyi kudi bene Isalela ba mu abo mafuku’a?

⁴ Yoshua wākankamikile bene Isalela kuleka kulonda mitōtelo ya bubela ne bisela bya bankambo babo. Amba: “Pano nanshi akamwai Yehova, ne kumwingidila aye mu boloke ne binebinepo; kadi fundulai baleza baingidile bashenu bobwa bukila bwa Munonga, ne mu Edipito, kabidi ingidilai Yehova.” (Yoshua 24:14) Yoshua wādi mulamate kudi Leza, Yehova nandi wāmwesela. Shi tulamate kudi Yehova, i bine netu uketwesela.​—2 Samwele 22:26.

5. Mwanda waka tufwaninwe kufundula bintu byonso bya majende?

⁵ Kulupuka mu mutōtelo wa bubela i ne konakanya bintu byo-byonso bya majende byotudi nabyo, kifwa bikuya, bijimba, lumpete nansha nkano ya majende, ne byonso bidi namino. Kino kidi na mvubu mwanda kilombola amba tubatūla kikulupiji kyetu kyonso mudi Yehova.

6. Bene Kidishitu ba pa kala bālongele kika na mikanda yabo ya majende?

⁶ Ivwana byālongele bene Kidishitu ba pa kala pobāsumininwe kulonda mutōtelo wabine. Bible unena’mba: “Bakwabo nabo bavule badi balonga bya majende baungwija mikanda yabo pamo basoka’yo ku meso a bonso.”​—Bilongwa 19:19.

7. Shi bademona betukambakanya, tufwaninwe kulonga namani?

⁷ Bamo bakishilulashilula kwingidila Yehova bādi bamfwityi, bankinda, nansha ba majende, bakokeja kukambakanibwa na bademona. Shi nobe bakukambakanyanga, abija Yehova na diwi dikatampe mu milombelo, umutela ne kumutela pa dijina. Ukakukwasha.​—Nkindi 18:10; Yakoba 4:7.

8. Bene Kidishitu bamonanga namani bankishi, byelekejo, ne bifwatulo bingidijibwanga mu butōtyi bwa bubela?

⁸ Boba basaka kwingidila Yehova kebafwaninwepo kulama bankishi, byelekejo, nansha bifwatulo bya mu mutōtelo wa bubela. Bene Kidishitu babine banañanga na ‘lwitabijo, ke pa kumonapo na meso.’ (2 Kodinda 5:7) Balēmekele kijila kya Leza kipeleja kwingidija kyelekejo kyo-kyonso mu butōtyi.​—Divilu 20:4, 5.

9. I madingi’ka etudingila Bible shi tusaka kwikala ba tunangu?

⁹ Bible unena’mba: “Wenda na ba tunangu ukekala wa tunangu.” (Nkindi 13:20, BB) Shi tusaka kwikala ba tunangu, i biyampe twende pamo na Batumoni ba Yehova, bine twibalamatei. Bo bantu bendanga mu dishinda ditwala ku būmi.​—Mateo 7:14.

10. Le Batumoni ba Yehova babwanya muswelo’ka kukukwasha nobe ushilule kwingidila Leza?

¹⁰ Batumoni i bayuke kubanga bantu nabo. Mwingilo wabo i wa kukwasha boba ba mityima myoloke nabo bayuke bubinebine budi mu Bible butwala ku būmi bwa nyeke. Bakakukwasha na kwifunda nobe Bible ku bitupu. Bakalondolola bipangujo byobe ne kukulombola muswelo wa kwingidija buyuki bwa Bible mu būmi bobe.​—Yoano 17:3.

11. Le kupwila kwa bwine Kidishitu kukokeja kukukwasha muswelo’ka?

¹¹ Kapwile nabo ku Njibo ya Bulopwe kobapwidilanga divule, ukayuka’ko bintu bivule pa mashinda a Yehova. Kobe kwabila kulonda mutōtelo wabine kukaningishibwa. Kadi ukafundijibwa’ko muswelo wa kukwasha bakwenu nabo bayuke bubinebine budi mu Bible.​—Bahebelu 10:24, 25.

12. Milombelo ibwanya kukukwasha muswelo’ka nobe ushilule kwingidila Leza?

¹² Mu kwenda kuyuka bivule pa kiswa-mutyima kya Yehova ne mpango yandi, kukabulwepo kutamina’ko mu kutendela mashinda andi mayampe. Ne kadi ukatamija kwabila kobe kulonga bimusangaja ne kwepuka kulonga bimufityija mutyima.  Vuluka amba ukokeja kufwena Yehova mu milombelo ya kumulomba akukwashe ulonge byoloke ne kwijiba ku bibi.​—1 Kodinda 6:9, 10; Fidipai 4:6.

13. I muswelo’ka okokeja kutōkeja Yehova mutyima?

¹³ Mu kwenda kutama ku mushipiditu, ukayuka amba kwikala Kamoni wa Yehova mwipāne, mubatyijibwe, kudi na mvubu. Shi ubelunga ku mulongo wa bantu ba Yehova, ukatōkeja Yehova mutyima. (Nkindi 27:11) Ukabadilwa mu bantu ba nsangaji banenena’po Leza amba: “Nkēkalanga monka mudi abo, ne kunanga monka mudi abo; kadi nkēkala Leza wabo nabo bakēkala bantu bami.”​—2 Kodinda 6:16.