Busongi bubutulanga kisaka kipya. Nansha byokaswa ne kulēmeka nyeke bambutwile bobe, ino yuka amba mwinē pobe pano ye ke muntu wa mvubu mikatampe kodi pano pa ntanda. Kino kibwanya kwikala kikomo ku babutule bobe bamo kwitabija’kyo. Inoko misoñanya ya mu Bible ibwanya kukwikadija na bujalale, ulame ndoe na babutule bobe koku ulonga buninge bwa kushimatyija kipwano na kisaka kyobe kipya.

BINENA BIBLE: “Lēmeka shobe ne inobe.” (Efisesa 6:2) Nansha shi wi mukulumpe namani, ufwaninwe nyeke kukōkela ne kulēmeka bambutwile bobe. Yuka kadi amba mwinē pobe nandi i mwana, ufwaninwe kuta mutyima ku bambutwile bandi. “Buswe kebudipo na mukao,” nanshi kokafītwa pa mwanda wa kipwano kipwene nabo mwinē pobe.—1 Kodinda 13:4; Ngalatea 5:26.

BYOMUKOKEJA KULONGA:

• Leka binenwa bya kikonge, kimfwa “Kyobe kisaka kimfutululanga nyeke” nansha amba “Inobe kasangelangapo nansha dimo byononga”

• Mona bintu mumwena’byo mwinē pobe

BINENA BIBLE: ‘Mwana-mulume ukashia shandi ne inandi, ebiya ukalamata kudi wandi mukaji, kadi bakekala ke ngitu imo.’ (Ngalwilo 2:24) Shi mubesonge, bambutwile bobe babwanya kwiivwana amba bakidi na lupusa podi, lwa kusaka kwikuja mu myanda ya busongi bwenu bipite kipimo.

I abe ne mwinē pobe bo bakwiteleka pa mikalo yomukebatūdila ne kwibayukija’yo na bulēme. Mubwanya kunena patōka ino pampikwa kasumalomo. (Nkindi 15:1) Kwityepeja, butūkanye ne kitūkijetyima bikakukwasha ushimatyije kipwano kiyampe na babutule benu ne kwendelela kwitūkijija “mutyima na buswe banwe bene na bene.”— Efisesa 4:2.

BYOMUKOKEJA KULONGA:

• Shi mujingwa mutyima mwanda wa babutule benu bekuja bininge mu myanda ya busongi bwenu, nankyo mwisambilei’po na mwinē pobe kitatyi kyomudi ku matwi talala

• Mwitelekei mwa kupwijija ino myanda