Kubutula mwana kuletelanga ba mulume ne mukaji nsangaji kadi ne kulēmenenwa. Byomukidi bambutwile bangiya, musa kutulumuka kitatyi kyenu kilampe ne bukomo bwenu bipityila’nka ku kukwatakanya mwana. Kukesha, pamo ne kushinta miivwanino kubwanya kutūla kipwano kyenu pa ditompo. Bimulomba abe ne mwinē pobe kushinta ngikadilo yenu mwa kukwatakenya mwana ne kulama busongi bwenu. Le madingi a Bible abwanya kwimukwasha namani munekenye ano makambakano?

BINENA BIBLE: “Buswe budi na kitūkijetyima ne kanye.” Kadi buswe “kebukimbangapo tumweno twa abo bwine, kebukelwangapo bulobo.” (1 Kodinda 13:4, 5) Byokidi inabana ngiya, i kyendele’mo kuta mutyima nakampata obe mwana. Inoko, obe mulume ubwanya kwimona bu ubamusula, nanshi kokavulaminwa’ko amba ufwaninwe kwibata mutyima abo bonso. Ubwanya kumukwasha na kitūkijetyima ne kanye eimvwane amba udi na mvubu kadi i mwipāne mu kukwatakanya wenu mwana.

“Banwe balume nenu, ikalai nabo nyeke . . . mwendele buyuki.” (1 Petelo 3:7) Yuka’mba obe mukaji ukapwila bukomo bwandi buvule ku wenu mwana. Pano kadi na biselwa bipya, ubwanya kwikala na njia, mpungiji, nansha kutyumukwa mutyima. Kitatyi kimo, ukokeja ne kukukalēla, ino ikala nyeke mutūkije mutyima, mwanda “yewa wijanga pa kufuna bulobo utabukile būya muntu mukomokomo.” (Nkindi 16:32) Ikala na nangu, umukwashe bukwashi bumufwaninwe.—Nkindi 14:29.

BYOMUKOKEJA KULONGA:

• Bashabana: Kwasha obe mukaji akwatakanye mwana, nansha ke bufuku. Tyepeja’ko kitatyi kyoloñanga bintu bikwabo mwa kushikatyila kitatyi kivule pamo na obe mukaji ne obe mwana

• Bainabana: Shi obe mulume usaka kukukwasha ku mwana, itabija. Nansha shi walongakanya’byo, kokamufutulula, abe mulombole na kanye mwa kulongela

BINENA BIBLE: ‘Bakekala ke ngitu imo.’ (Ngalwilo 2:24) Nansha shi mubaikala na wa mu kisaka mupya, vuluka amba abe ne mwinē pobe mwi “ngitu imo.” Longai bukomo bwenu bonso bwa kuningija kipwano kyenu.

Banwe bakaji, fwijai’ko benu balume bemukwashanga ne kwimwela’ko kuboko. Binenwa byenu bya kufwija’ko biletanga “bukomo.” (Nkindi 12:18) Banwe balume, sapwilwai benu bakaji amba mwibaswele kadi mwibakwete na mutyika. Mwibatendelei pa muswelo obakwatakanya kisaka.—Nkindi 31:10, 28.

“Nanshi muntu ne muntu kakikimba kamweno ka aye mwine, ino akimbe nyeke kamweno ka mukwabo.” (1 Kodinda 10:24) Longela nyeke mwinē pobe byobya bilumbuluke kutabuka. Byomudi ba mulume ne mukaji, mwisambilei pamo, mwifwija’ko ne kwiteja banwe bonso. Ikalai bambulwa kwisakila mu myanda itala kusambakena pamo. Vuluka bisakibwa bya mwinē pobe. Bible unena’mba: “Kemwakīsuminwai banwe bene na bene, poso mweivwanika banwe bonso.” (1 Kodinda 7:3-5) Nanshi mwisambei pa bubidi bwenu uno mwanda pampikwa kwifyamina. Kitūkijetyima ne kwivwanija kwenu kukaningija kipwano kyenu.

BYOMUKOKEJA KULONGA:

• Kemwakilwai kushikatyila pamo pa bubidi bwenu

• Longela mwinē pobe tubintu tutyetutye tumwivwanija amba umuswele, kimfwa kumutumina kamusapu nansha kumupa kakyabuntu

BINENA BIBLE: “Tamba ku bwanuke uyukile bilembwa bijila, bikokeja kukwalamuna kodi wa tunangu mwanda wa lupandilo.” (2 Temote 3:15) Tūla mpangiko ya kufundija obe mwana. Udi na ñeni ibezemukwa ya kufunda, nansha shi kabutwilwe. Mwana ukokeja, aye ukidi munda, kuyuka diwi dyobe ne kubezemuka ku byolonga. Mutangile pakidi mwanuke, nansha shi kevwanijapo byotanga. Bikamushila kibidiji kya kusangela kutanga pakatama.

Obe mwana ke kibudyebudyepo kikomenwa kukwivwana wisamba myanda ya Leza. Mufwenye akwivwane polombela kudi Yehova. (Kupituluka 11:19) Ne pomukaya kya pamo, nena myanda ya bintu bilongele Leza. (Ñimbo 78:3, 4) Penda patama obe mwana, ukatengwa pa mutyima na bobe buswe boswele Yehova, nandi ukafunda kumuswa.

BYOMUKOKEJA KULONGA:

• Lombela ulomba tunangu mwa kutamijija obe mwana

• Pituluka mu milangwe ne bishima bikatampe kudi obe mwana, nandi alwile’ko kala kufunda’byo