SHI ubamone muntu mulampe’nka bwa musaka wa njibo yenu upita kubwipi nobe, ukalanga’po kika? Muntu wa uno muswelo i kampangala! Mu kitatyi kimo kwādi batumpangala pano pa ntanda. Bible ulombola’mba bashabo bādi bamwikeulu bātambile mūlu. Ino lelo kyāikele namani?

Vuluka’mba mwikeulu umbi, Satana, wādi na mwingilo wa kutūla kavutakanya. Wādi utompa kutonona bamwikeulu ba Leza nabo bekale babi. Kitatyi kimo, bamwikeulu bamo bāshilwile kwivwana byādi binena Satana. Bāleka mwingilo wēbapele Leza momwa mūlu. Kupwa bāiya pano panshi bevwika imbidi ya bantu. Uyukile i mwanda waka?

Bible unena’mba i pa mwanda bāmwene bana-bakaji ba buya bwa dyangi pano pa ntanda ne bādi basaka kwikala nabo pamo. Ebiya bātūkila pano panshi ne kusonga bano bana-bakaji. Bible unena’mba kino kilongwa kyādi kibi, mwanda Leza wāpangile bamwikeulu bekale mūlu.

Bamwikeulu ne babo bakaji pa kubutula bana, bano bana bādi beshile na bana bakwabo. Pa kubutulwa, kebādipo beshidile na bana bakwabo. Ino pa kutama bādi benda bapuñama enka kupuñama, ne bukomo bwabo bwādi buvudila’ko, kufika ne byobāikele ke batumpangala.

Bano batumpangala bādi bantu babi. Bādi basusula bantu, mwanda bādi bapuñame kadi bādi bakomo. Bādi batonona bantu bonso bekale babi pamo’nka bwa abo.

Enoke wādi kemufwe kala, ino kwādi muntu mukwabo pano pa ntanda wādi muyampe. Uno muntu i Noa. Wādi ulonga nyeke bisaka Leza.

Difuku dimo, Leza wāsapwila Noa’mba pano kitatyi kibafika kya Aye konakanya bantu bonso babi. Ino Leza wālaile kupandija Noa, kisaka kyandi ne banyema bavule. Tutalei mwālongele Leza.