PANJA pa safini, bantu bādi bendelela na būmi bwabo bwa mafuku onso. Kebāitabijepo’mba Dilobe dikāya. Bādi basepa bininge kashā. Ino pakubulwa ne kwija kwine, tusepo twafula.

Ponka’po, mema āshilula kupunguluka. Ādi atamba mūlu ke amwangika panshi, pamo na momwangilanga mema mu mbeketyi. Noa wādi na bubinga! Inoko kitatyi kya bantu kutwela mu safini kyādi ke kipite kala. Yehova wādi mushite bininge ku kibelo.

Kitatyi kityetye’tu, misanza yonso yāyula mema. Mema āikala bwa minonga mikatampe. Āponeja mityi, kufulamuna mabwe makatakata, kadi ādi atūta bikatampe. Bantu bāimvwene moyo. Bākanda ku ngulu milamila. Yō, shi bātejeje Noa ne kutwela mu safini pādi kepashityilwe ku kibelo! Pano kekukidipo kadi muswelo.

Mema ādi enda avula’nka kuvula. Mema āpungulukile mūlu umbula bwa mafuku 40, mwinya ne bufuku. Āfika ne pa nsongo ya ngulu, mu kitatyi kityetye ne ngulu milampe mine yātokena mu mema. Enka na mwānenene Leza, bantu bonso ne banyema bādi panja pa safini bāfwa. Ino boba bādi munda bāpanda.

Noa ne bandi bana bāingile mwingilo muyampe wa kūbaka safini. Mema atundwile safini, nayo yālela kūlu kwa mema. Difuku dimo, kupwa kwa mvula kuketeka, dyuba dyāshilula kutema. Kyādi kya kutendelwa kashā! Konsokonso dyādi dijiba dyonka. Enka safini ye kintu kyāshele kimwekele kilela pa mema.

Batumpangala pano ke kutupu’bo. Kutupu kadi wa kususula bantu. Bonso bāfwa, ne bainabo bene ne bantu bakwabo bonso. Lelo bashabo nabo?

Bashandya tumpangala kebādipo bantu bwa batwe. Bādi bamwikeulu bāile kushikata pano pa ntanda. O mwanda pāile Dilobe, kebāfwilepo pamo na bantu bakwabo. Bāvudile ngitu ya bu muntu, bājokela mūlu bu bamwikeulu. Ino kebāitabijibwepo monka mu kisaka kya bamwikeulu ba Leza. Penepo bāikala ke bamwikeulu ba Satana. Mu Bible batelwanga bu bademona.

Ebiya Leza wāpukumija luvula, mema a dilobe ashilula kūma. Myeji itano pa kupita’po, safini yākashika pa lūlu. Papita mafuku mavule, bādi mu safini bāmona masongo a ngulu. Mema ādi enda ōma enka kūma.

Kupwa Noa wātambija kinkombe mu safini. Kyāselakana koku ne koku kyājoka, mwanda ke kyāmwenepo kwa kutumba kuyampe. Kyādi kyenda enka namino kijoka kīya kitumba pa safini.

Noa wādi usaka kuyuka shi mema abaūme pano pa ntanda. O mwanda wātambije nkutyi nandi mu safini. Penepa nkutyi’wa wājoka mwanda kāmwenepo pa kutumba. Noa wāmutuma musunsa wa bubidi, wājoka na dyani dya umpafu ku mulomo wandi. Noa wāyuka’mba mema abaūme. Kupwa Noa wātuma nkutyi musunsa wa busatu, wātāna pa nshi myūmu pa kwikala.

Papo Leza wēsamba na Noa. Wāmunena’mba: ‘Tamba mu safini. Tambija ne kisaka kyobe ne banyema bodi nabo.’ Bālēle mwaka mutuntulu ne kupita mu safini. Langa’po nsangaji yabo abo bonso pobātambile panja bōmi!