TALA bidi kino kisaka kikatampe. Bano i bana bana-balume 12 ba Yakoba. Kadi udi na bana bana-bakaji. Lelo uyukile majina a bano bana? Twifundei majina abo.

Lea wābutwile Lubeni, Shimioni, Levi ne Yuda. Letyela wāfityilwe bikatampe mwanda kādipo ubutula. Ponka’po, wāpa Yakoba mwingidi wandi Bidiha, nandi wābutula bana bana-balume babidi betwa bu Dani ne Nafatale. Kupwa Lea nandi wāpa Yakoba mwingidi wandi Zidipa, Zidipa wābutula Ngade ne Ashela. Kupwa Lea wābutula bana bakwabo babidi, Isakala ne Zebuluna.

Kupwa Letyela nandi wābutula mwana. Wāmwita dya bu Yosefa. Kumeso tukefunda bivule bitala Yosefa, mwanda wāikele ke muntu mukatampe mpata. Bano bo bana 11 ba Yakoba bābutwile paādi ushikete na Lebane, shandya Letyela.

Yakoba wādi kadi ne na bana bana-bakaji, inoko Bible utelele enka dijina dya umo, Dina.

Kitatyi kyābwene kya Yakoba kushiya Lebane ne kujokela ku Kenani. Ponka’po, wābungila kyandi kisaka kikatampe pamo ne luombe lwandi lukatampe lwa mikōko ne bañombe, kaenda lwendo lulampe.

Yakoba ne kisaka kyandi pa kujokela mu Kenani mafuku matyetye, Letyela wābutula mwana mukwabo. Wābutwile pobādi bakidi mu lwendo. Letyela wāsusukile bininge, ebiya wāfwa pa kupwa kubutula. Inoko mwana mwana-mulume waābutwile wāpanda. Yakoba wāmwinika dya bu Benjemani.

Tufwaninwe kuvuluka majina a bana 12 ba Yakoba mwanda muzo onso wa Isalela i mutambe kobadi. Misuku 12 ya Isalela itelwanga pa majina a bana ba Yakoba 10 ne bana babidi ba Yosefa. Isake wāikele myaka mivule pa kupwa kubutulwa kwa bano bana bana-balume bonso, bine, wāloelelwe bikatampe pa kwikala na bankana bavule. Inoko, tutalei bidi kyāfikile wandi munkana nsongwakaji Dina.