YOSEFA wakomenwa kūmija mutyima kitatyi kilampe. Wanena bengidi bonso batambe mu kyumba. Pa kushala kasuku na banababo, Yosefa washilula kudila. Tukokeja kulanga mwatulumukila banababo, mwanda kebayukilepo kyadidila. Ku mfulo webanena’mba: ‘Ami ne Yosefa. Le tata ukidi mūmi?’

Banababo abatulumuka bininge ne kya kunena kibebabulwe. Abakwatwa moyo. Ino Yosefa wanena’mba: ‘Fwenai kondi.’ Abo pa kumufwena, webanena’mba: ‘Ne mwanenu Yosefa, omwāpoteje mu Edipito.’

Yosefa lusa lubamukwata, kanena’mba: ‘Kemukītopekai pa mwanda omwāumpoteje kuno. Leza ye wāntumine kuno ku Edipito mpandije būmi bwa bantu. Felo i mumbikike mu ntanda yonso. Pano pejai mwende kudi tata mukamulombole byonso bino’bi. Mulombolei aye ekale kuno.’

Kupwa Yosefa wafumbakanya banababo ne kwibafifya abo bonso. Penepa Felo waivwana’mba banababo na Yosefa i bāye, wanena Yosefa’mba: ‘Wibaleke basele makalo bakapaike shabo ne bisaka byabo, bāye nabo kuno. Nkebapa ntanda milumbuluke mu Edipito.’

Nabo ye mobālongele. Omwene uno i Yosefa utundaila shandi pa kufika mu Edipito ne kisaka kyandi kyonso.

Kisaka kya Yakoba ke kikatampe. Pobāvilukile mu Edipito bādi 70, kubadila’mo Yakoba ne bana bandi ne bankana bene kumo. Kadi kwādi ne babo bakaji ne bengidi bavule. Bonso bāile mu Edipito. Bādi bebeta bu Bene Isalela, mwanda Leza wāshintyile dijina dya Yakoba bu Isalela. Bene Isalela bāikele ke muzo wa Leza wa pa bula, ye motukekimwena kumeso kotwenda’ku.