TALA Mosesa unyema mu Edipito. Lelo ubamone bana-balume bamulonda’ba? Uyukile mwanda obakimba kwipaila Mosesa? Leka tumone shi tukokeja kuyuka.

Mosesa wātamīne mu njibo ya Felo, mulopwe wa Edipito. Wāikala ke muntu mukatampe ne wa tunangu. Mosesa wāyukile’mba aye kādipo Mwine Edipito, ino bambutwile bandi ba bine i bapika Bene Isalela.

Difuku dimo, Mosesa paādi kadi na myaka 40, wāendele kukatala mwikadile banababo. Bādi basusulwa bya mwiko. Wāmona Mwine Edipito ukupila umpika Mwine Isalela. Mosesa wātala koku ne koku, kutupu muntu, penepa wākupila Mwine Edipito, ne kufwa wafwa. Kupwa Mosesa wāmufya mu musenga.

Difuku dikwabo Mosesa wātamba kutala monka banababo. Wādi ulanga amba ukokeja kwibakwasha baleke kwikala bapika monka. Ino wāmona Bene Isalela babidi bana-balume bekupila, penepa Mosesa wānena wādi mulube amba: ‘I kika kyokupidila mwanenu?’

Mwana-mulume wānena’mba: ‘I ani wakutūla bu mfumu ne bu mutyibi wetu? Lelo kosake ungipaye mowaipaile Mwine Edipito?’

Mosesa wākwatwa moyo. Wāyuka’mba bantu abajingulula byonalongele Mwine Edipito. Felo nandi wāivwana’o, wātuma bantu bakepaye Mosesa. Kino ye akyo kyānyemene Mosesa mu Edipito.

Mosesa pa kutaluka mu Edipito, wāendele kulampe ku ntanda ya Midyana. Wēkutana kisaka kya Yefelo, wāsonga wandi mwana mwana-mukaji witwa bu Zipola. Mosesa wāikala ke mukumbi wa mikōko ya Yefelo. Wāshikata ku Midyana myaka 40. Pano wādi kadi na myaka 80. Difuku dimo, Mosesa wādi ukumba mikōko ya Yefelo, penepo kwāmumwekela kintu kimo kyāalamwine būmi bwandi bonso. Pūtula dino dyani, utale kino kintu kya kutulumukwa.