TALA’PO uno nkasampe, udi bya lusa ne bya bulanda. I Yosefa. Banababo abamupoteja ku bano bana-balume benda ku Edipito. Yosefa wākekala’ko bu umpika. Mwanda waka banababo bālongele kintu kibi uno muswelo? Mwanda bākwatyīlwe Yosefa mukao.

Shabo Yakoba wādi usenswe Yosefa bininge. Wālombwele buswe bwandi na kumupa mutwelo muyampe mulampe. Batutu wandi 10 pa kumona Yakoba mwasanshilwe Yosefa, bāshilula kumushikwa ne kumukwatyilwa mukao. Ino kwādi ne bubinga bukwabo bobādi bamushikilwe.

Yosefa wālotele bilotwa bibidi. Mu bino bilotwa byandi byonso bibidi, wāmwene banababo bamufukatyila. Yosefa pa kulombola banababo bino bilotwa, nabo po pene bāmushikwa kupita.

Ebiya difuku dimo, batutu wa Yosefa bākakumbile mikōko ya Shabo, Yakoba wātuma Yosefa ende akebatale mobekadile. Banababo pa kumumona wiya, bamo kebanena’mba: ‘Tumwipayei.’ Ino Lubeni tutu wabo mukulu, wānena’mba: ‘Mhm, kemukilongai nankyo!’ Penepa bākwata Yosefa ne kumwela mu kina mwakubulwa mema. Bāshikata kebakimbe kya kumulonga i kika.

Ponka’po, Bene Ishemele bana bana-balume baiya. Yuda wānena banababo’mba: ‘Tumupotejei ku Bene Ishemele.’ Bālongela monka. Bāpoteja Yosefa ku bityele 20 bya ndalama. Yō, bine kebādipo na lusa!

Lelo banababo bākalombwele shabo kika? Ponka’po bātapa mbuji ne kutubika misunsa mivule mutwelo mulumbuluke wa Yosefa mu mashi a mbuji’wa. Bātuma mutwelo kudi shabo Yakoba amba: ‘Tubatana kino’ki. Jingulula umone shi ke mutwelopo wa Yosefa.’

Yakoba wēutala’mba i ao. Wādila’mba: ‘Yō, padi i nyema wa budyani wābokwete Yosefa.’ Ne ye akyo kyādi kisaka banababo na Yosefa kukulupija shabo. Yakoba wāfitwa mutyima bininge. Wāmudila mafuku mavule. Ino Yosefa kāfwilepo. Tutalei byāmufikile kokwa kwaāselelwe.