BIBUNDI bivule bya mu Kenani bīlongololanga mwanda wa kulwa na Isalela. Balañanga’mba basa kwibatyumuna. Inoko Bene Ngibeone ba pabwipi kebalañangapo uno muswelo. Bakulupile’mba Leza ukwashanga Bene Isalela, kadi kebasakilepo kulwa na Leza. Ino lelo uyukile byalonga Bene Ngibeone?

Abatyibe mbila ya kwimwekeja bwa abo bekalanga kulampe bininge. Bamo umbukata mwabo abavwala bisandi bipandamuke, ne bilato bishinike. Abatwika bimbulu byabo mifuko ya kala ne kusela mikate myumu kadi mibunde. Kupwa abafika kudi Yoshua kebanena’mba: ‘Tutambanga kulampe bininge, mwanda twaivwene besambila padi Yehova, Leza wenu mukatampe. Twaivwene byonso byaemulongēle mu Edipito. Ino bakulu betu abetunena kulongolola mpao ya lwendo ne kwiya kwimunena’mba: “Twi bengidi benu. Mwitutyipilei’mba kemukalupo netu.” Talai bivwalwa byetu i bisanike mu lwendo lulalula ne mikate yetu i mibunde ne kūma pō.’

Yoshua ne bamfumu bakwabo abakulupila Bene Ngibeone. Penepo abatyipe amba kebakalupo nabo. Ino mafuku asatu kupita’po abajingulula’mba Bene Ngibeone nanshi i ba pabwipi ponka.

Yoshua webepangula’mba: ‘Mwanda waka mwetulombwele’mba mutambanga kulampe?’

Bene Ngibeone abalondolola’mba: ‘Twalongele uno muswelo mwanda betulombwele’mba Yehova Leza wenu wālaile kwimupa ino ntanda yonso ya Kenani. Penepo twakwetwe moyo kutyina’mba mwaketwipaya.’ Ino Bene Isalela abalama mutyipo wabo, ne kwipaya Bene Ngibeone mpika. Inoko abebatūla ke bengidi babo.

Penepo mulopwe wa Yelusalema walobe mwanda Bene Ngibeone abapwana na Isalela. Ebiya wanena balopwe bakwabo baná’mba: ‘Iyai munkwashe’ko, tukatambe Ngibeone divita.’ Bano balopwe batano abalongela monka. Lelo Bene Ngibeone baikele badyumuke pa kusamba kipwano na Isalela kintu kyatonona bano balopwe bāye kulwa nabo? Tusa kutala.