TALA! Bene Isalela aba babuka Munonga wa Yodano! Ino le mema adi kwepi? Mvula byanoka bikomo mu kino kitatyi kya mwaka, kepaijije munonga wadi muyule bā’nka ne pa milomo. Ino pano mema onso abaūme! Bene Isalela babukanga munonga pa nshi myumu tē enka na mobāabukile pa Kalunga Katyila! Lelo mema onso i mende kwepi? Tutalei bidi.

Bene Isalela pa kwabuka Munonga wa Yodano, Yehova wasapwidile Yoshua alombole bantu’mba: ‘Babitobo bakasela dikumbo dya kipwano ne kwibabadikila. Pobakanyanta mayo abo mu mema a Munonga wa Yodano, penepo mema akaleka kukuka mulungu.’

Penepo babitobo batekuna dikumbo dya kipwano ne kwidisela kumeso kwa bantu. Abo pa kufika ku Yodano, babitobo abaimana nshinkidingi mu mema. Papo mema akuka mulungu mukomokomo, ne mushike’o. Ino mayo abo atenga’tu mema, ponka’po abaleka’byo kukuka mulungu! I kingelengele! Yehova waimika mema a kuntenta. Ponka’po mema a munonga abaūme!

Babitobo baselele dikumbo dya kipwano abakemana pa bukata bwa munonga mūmu. Lelo wibamwene pa kifwatulo’pa? Abo papo bemene, Bene Isalela abaabuka Munonga wa Yodano panshi pōmu pō!

Muntu yense pa kupwa kwabuka, Yehova wasoñanya Yoshua anene bana-balume 12 bankanka’mba: ‘Endai pemene babitobo na dikumbo dya kipwano mu munonga. Muboye’po mabwe 12, mubungile’o pomukalādila bufuku. Kupwa, mu mafuku a kumeso, shi benu bana kebemwipangula nshintulwilo ya ano mabwe, mukebalombola’mba mema āimene kitatyi kyāabukile dikumbo dya kipwano dya Yehova mu Yodano. Mabwe akemuvuluja kino kingelengele!’ Yoshua nandi wabunge mabwe 12 pemene babitobo mu kyalo kya munonga.

Ku mfulo Yoshua wanena babitobo baselele dikumbo dya kipwano amba: ‘Abukai Yodano.’ Abo babuka’tu, munonga ubaalula kukuka mulungu monka.