MYAKA pano yenda ipunguluka—myaka 10, myaka 20, myaka 30, myaka 39! Bene Isalela bakidi enka mu ntanda mutuputupu. Inoko, ino myaka yonso Yehova ulamine bantu bandi. Wibadisha mana. Mwinya wibendeja na dilenga dya dikumbi, bufuku na dilenga dya mudilo. Myaka yonso’i bisandi byabo kutupu kusanika ne maulu abo kutupu kuyula.

Pano ke mweji umbajinji wa mwaka wa 40 tamba kasha balupuka mu Edipito. Bene Isalela abashimika monka kitūlo mu Kadesha. Pano ye pobadi kitatyi kyatuminwe batubedibedi 12 kukabela ntanda ya Kenani, pano kepadi kubwipi kwa myaka 40. Ebiya Midiamu kaka wa Mosesa wafwila ku Kadesha. Enka na mobyaikadile kala, kadi kavutakanya kabaikala’ko monka.

Bantu kebatenepo mema nansha matyetye. Penepo kebatompwela Mosesa’mba: ‘Shi twafwile longa i biyampe. Le kyowetulupwidile mu Edipito kwiya kwitutūla kuno kwakubulwa bumeni i kika? Kutupu miseke ne bikuyu, ne mañanza, ne makamamanga mene. Ne mema mene a kutoma kutupu’o.’

Mosesa ne Alone pa kwenda kukalombela ku tabenakulo, Yehova wanena Mosesa’mba: ‘Bungila bantu pamo. Kupwa ku meso a bantu bonso nena na dibwe’dya. Ebiya mema mavule akalondomoka mwanda wa bantu ne banyema batome.’

Penepo Mosesa wabunge bantu, kanena’mba: ‘Ivwanai, banwe kebakulupilepo mudi Leza! Le musaka Alone ne ami twimutambijije mema mu dino dibwe?’ Kupwa Mosesa wakupila ku dibwe’dya misunsa ibidi na mukombo, ne mulungu wa mema ubaalula kulondomoka mu dibwe. I mema mavule a kutoma bantu ne banyema bonso.

Inoko Yehova wakalabela Mosesa ne Alone. Uyukile i mwanda waka? Mwanda ba Mosesa ne Alone abanene’mba abo basa kulupula mema mu dibwe. Ino na bubine i Yehova wealupula. Mwanda ba Mosesa ne Alone kebanenepo bubine pa uno mwanda, Yehova wanena’mba ukebapa mfuto. Wanena’mba: ‘Kemukatwejapo bantu bami mu Kenani.’

Ponka’po Bene Isalela abataluka ku Kadesha. Na pano ponka abafika ku Lūlu lwa Hola. Alone wafwila ku nsongo ya luno lūlu. Wafu na myaka 123. Bene Isalela abakwatwa bulanda, kadi bantu bonso abadila Alone mafuku 30. Wandi mwana Eleaza wamupyana bu kitobo mukatampe wa bubidi wa muzo wa Isalela.