SOLO ukikimba’nka kwipaya Davida. Pano wasela basola 3 000 baekulupidile, kakakimbe Davida. Davida pa kuyuka uno mwanda, watume bantu bakukabela pasa kulāla Solo ne bantu bandi bufuku. Penepo Davida waipangula bantu babidi mu badi nabo’mba: ‘I ani usa kwenda nami tukabele kudi Solo?’

Abishai walondolola’mba: ‘Ami nsa kwenda nobe.’ Abishai i mwanā Zeluya kaka wa Davida. Aye Solo ne bantu bandi balele, Davida ne Abishai abatwela kitalala-nyā mu kitūlo. Abasela mukobe wa Solo ne mutyibi wandi wa mema udi ku mitwe kwa Solo. Kutupu webamona nansha kwibevwana kwine mwanda badi mu tulo tukatampe.

Pano tala Davida ne Abishai. Ke bende kulampe, kadi abafika bakomo pangala pa lūlu. Ebiya Davida waela lubila kudi mukulumpe wa basola ba Isalela’mba: ‘Abenele, le ulamine mfumobe mulopwe namani? Tala bidi! Le mukobe wandi ne mutyibi wandi wa mema bidi kwepi?’

Solo wabūka. Kadi wajingulula diwi dya Davida kaipangula’mba: ‘Le wi Davida’ni?’ Lelo umwene Solo ne Abenele kunshi’ku?

Davida walondolola Solo amba: ‘A mfumwami mulopwe, i ami.’ Penepo Davida waipangula’mba: ‘Kyosaka kunkwatyila i kika? Le i kibi’ka kyonkulongele? A mulopwe, mukobe obe ou kuno. Tuma umo wa mu bobe bantu āye asele’o.’

Solo waitabija’mba: ‘Nalonga bibi, kadi nalonga bya bulembakane.’ Kupwa Davida waenda kungi, Solo nandi wajokela kwandi. Ino Davida kaenena’mba: ‘Difuku dimo Solo ukangipayanga. Mfwaninwe kunyemena mu ntanda ya Bene Fidishitia.’ Penepo walongela monka. Davida waongola Bene Fidishitia ne kwibakulupija’mba pano kendi ku wenu mutamba.

Mwenda mafuku Bene Fidishitia abaenda kulwa na Bene Isalela. Penepo Solo ne Yonafane abaipaibwa ku buno bulwi. Davida wakwatwa bulanda, kupwa walembe lwimbo luyampe, kaimbe’mba: ‘Nakwatwa bulanda, abe mwanetu Yonafane. Mwanda wadi muswedibwe wami!’

Kupwa pano, Davida wajokela mu Isalela ku kibundi kya Hebelona. Kubaikala divita pa bukata bwa bantu batongele Ishi-boshete mwanā Solo kwikala mulopwe ne bantu basaka Davida abikale. Ku mfulo bantu ba Davida abatyumuna divita. Davida wabikala na myaka 30. Waludika mu Hebelona mu bula bwa myaka isamba-ibidi ne kipindi. Bana bamobamo babutwidile kuno i Amenone, Abisalome ne Adoniya.

Ke dyakadilwe kantu, Davida ne bantu bandi abaenda kukakwata kibundi kya buya kitwa bu Yelusalema. Yoabe mwana mukwabo wa Zeluya, kaka wa Davida, waimanina buno bulwi. Penepo Davida wapala Yoabe mpalo na kumutūla bu mukulumpe wa basola. Pano Davida washilula kuludikila mu kibundi kya Yelusalema.