TALA muntu udi mu mema uno. Wasusuka bininge, mwene i amo? Ou mushipa keudi kubwipi na kumumina! Uyukile yeu muntu i ani? Dijina dyandi i Yona. Tutalei bidi kyaikadile mu masusu.

Yona i mupolofeto wa Yehova. Mafuku matyetye kupwa kwa lufu lwa mupolofeto Edisha, Yehova wanena Yona’mba: ‘Enda ku kibundi kikatampe kya Nineva. Bubi bwa bantu bubapite kipimo, nasake ukebalombole’bo.’

Ino Yona wapele kwenda’ko. Penepo wakanda mu kyombo kyenda dingi, waleka kwenda ku Nineva. Yehova wafītwa mutyima mwanda Yona wanyema. Penepo wapukumija luvula lukatampe. Papo kyombo kekikimbe kulobela. Bantu badi mu kyombo abakwatwa moyo, kebadidila baleza babo bebakwashe.

Ku mfulo Yona webalombola’mba: ‘Ntōtanga Yehova, Leza wāpangile diulu ne ntanda. Nanyema kulonga byaanena.’ Penepo bantu abamunena’mba: ‘Le tukulonge bika mwanda wa kutalaja luvula?’

Yona wanena’mba: ‘Ngelei pa dijiba, penepo nadyo dikatalala.’ Bantu kebasakilepo kumwela, ino po pene luvula lubebwejeja’ko, ku mfulo abamwela pa mema. Ponka’po luvula lubaleka’byo, dijiba nadyo dibatalala monka.

Ino Yona pa kutokena mu mema, mushipa mukatampe ubamumina. Ino aye kufwa mpika. Walāla munda mwa mushipa mafuku asatu mwinya ne bufuku. Yona wealakanya mwanda wapelele kukōkela Yehova ne kwenda ku Nineva. Le uyukile kyalonga Yona?

Yona walombe Yehova amukwashe. Penepo Yehova waolomokeja mushipa ne kulashila Yona pa nshi myūmu. Kupwa Yona waenda ku Nineva. Mwene kino kitufundijanga’mba, tufwaninwe kulonga byonso bitulombola Yehova?