LELO i bika le pano? Bantu badi na masobo makatampe. Mulopwe wa Babiloni i mwite beni ba bulēme kanunu kamo. Bengidijanga bitomeno bya nsahabu ne bya ndalama, ne ngeso yobāselele mu tempelo ya Yehova mu Yelusalema. Ino, amba batale, minwe ya kikasala kya muntu ibamweka ne kushilula kulemba ku lubumbu. Bonso abakwatwa moyo.

Pano mulopwe i Beleshazale, munkana Nebukaneza. Waela lubila lwa kwityija bantu bonso ba ñeni. Mulopwe wanena’mba: ‘Yense ukatanga bino bilembwa ne kwibishintulula, ukapebwa byabuntu bivule, kadi ukekala mwendeji wa busatu mu bulopwe.’ Ino bonso ba ñeni abakomenwa kwibitanga ne kwibishintulula.

Ebiya inandya mulopwe waivwana lunwa, penepo watwela mu kyumba kya kudīla’mo. Kanena mulopwe’mba: ‘Kokazakala. Kudi mwana-mulume umo wa mu bulopwe bobe uyukile baleza bakola. Pākidi nkambo obe Nebukaneza bu mulopwe, wāmutūdile bu mukulumpe wa ba ñeni bonso. Dijina dyandi i Danyele. Mwityije, ukakushintulwila bino byonso.’

Na pano ponka, abapaika Danyele. Danyele wapele byabuntu byonso, kupwa washilula kulombola mwanda’ka Yehova wābikwile Nebukaneza nkambo wa Beleshazale. Danyele wanena’mba: ‘Wādi witatula. Penepo Yehova wāmupa mfuto.’

Ebiya Danyele kanena Beleshazale amba: ‘Ino abe, wadi uyukile byonso byāmufikile, kadi nobe ubetatula’nka bwa Nebukaneza. Ubasela bitomeno ne ngeso ya mu tempelo ya Yehova kotomena’mo. Ubatumbija baleza ba mityi ne mabwe, ino kutendela Umpangi wetu Mukatampe mpika. O mwanda Leza watume kuboko kulembe byobi bilembwa.’

Danyele’mba: ‘Tala mobilembelwe, MENE, MENE, TEKEL ne UPHARSIN.’

‘MENE kishintulula’mba Leza wabala mafuku a bulopwe bobe ne kufudija’bo. TEKEL kishintulula’mba ubatompekejibwa pa kitompekejo, ubamweka bu mubi. UPHARSIN kishintulula’mba bulopwe bobe bubapebwa ku Bene Mede ne Bene Peleshia.’

Aye Danyele ukinena, Bene Mede ne Bene Peleshia abashilula kala kutamba Babiloni divita. Abakwata kibundi ne kwipaya Beleshazale. Bilembwa bya kuboko bibafikidila’nka bufuku’bwa! Ino kikekala namani ku Bene Isalela? Tusa kwibimona’nka pano, ino tutalei bidi byafikila Danyele.