TALA mingilo yonso ilongwa pano. Bene Isalela i bapilwe na lūbako lwa nsakwa ya Yelusalema. Mulopwe Nebukaneza paāsadile Yelusalema pano kepadi myaka 152, wābundwile nsakwa ne kusōka milango ya kibundi. Bene Isalela kebāubakilepo bidi nsakwa pobātambile dibajinji mu Babiloni.

Molangila, bantu bādi beivwene namani pa kwikala myaka yonso’i nsakwa ya kibundi mpika? Bādi bemona’mba badi mu kyaka. Balwana nabo bādi bakokeja kutwela ne kwibatamba bulwi bipēla byonka. Shi ke pano Nehemia ukwashanga bantu bobakulule nsakwa. Le uyukile Nehemia i ani?

Nehemia i Mwine Isalela utamba ku kibundi kya Shushane, kudi ba Modekai ne Eseta. Nehemia wāingile mu njibo ya mulopwe, nanshi padi wādi mulunda na Modekai ne Eseta Mukaja mulopwe. Inoko Bible kalombwelepo’mba Nehemia wāingidile Mulopwe Ahaswelusa, mulumya Eseta. Ino wāingidile Mulopwe Alatazelekishishi wālondele’ko.

Vuluka’mba, Alatazelekishishi i mulopwe muyampe wāpele Ezela lupeto luvule lwa kuneñenya nalo tempelo ya Yehova mu Yelusalema. Ino Ezela kāubakilepo nsakwa ya kibundi. Tutalei mwaingidila Nehemia ino mingilo.

Kepadi myaka 13 tamba Alatazelekishishi upa Ezela lupeto lwa kuneñenya nalo tempelo. Nehemia ye kaseya mukulumpe wa Mulopwe Alatazelekishishi. Kishintulula’mba upungulwilanga mulopwe vinyu, kadi ye utala shi kebamwelele’mopo misengo. Uno i mwingilo wa bulēme.

Difuku dimo, Hanani mwanabo na Nehemia, ne bantu bakwabo ba mu Isalela abaiya kupempula Nehemia. Abamulombola bikambija bya Bene Isalela, ne mukiponene nsakwa ya Yelusalema. Papo Nehemia wakwatwa bulanda, kupwa walombela kudi Yehova pa uno mwanda.

Difuku dimo mulopwe wajingulula bulanda bwa Nehemia, wamwipangula’mba: ‘Le mwanda’ka okwatyilwe bulanda?’ Nehemia wamulombola’mba, mwanda Yelusalema udi mu ngikadilo imbi, kadi nsakwa i mipone. Mulopwe nandi’mba: ‘Kyosaka i kika?’

Nehemia walondolola’mba: ‘Ndeke ñende nkobakulule nsakwa mu Yelusalema.’ Mulopwe Alatazelekishishi udi biyampe bininge. Wanena Nehemia ende, kadi wamukwasha na mbao ya kukōbaka nayo. Nehemia pa kufika mu Yelusalema, wasapwila bantu mpangiko yandi. Bantu abaitabija ne kunena’mba: ‘Tushilulei lūbako.’

Balwana na Bene Isalela pa kumona nsakwa ibakanda, kebanena’mba: ‘Tusa kwenda kukebepaya ne kwimika lūbako.’ Ino Nehemia waivwana uno mwanda, penepo wape bengidi bipete ne mikobe. Kaebanena’mba: ‘Kemwakityinai balwana netu. Lwilai banabenu, benu bana, bakaji benu ne mobo enu.’

Papo bantu abakankamana. Abapanze byabulwi byabo mwinya ne bufuku koku bōbaka. Penepo nsakwa ibapu mu mafuku 52 kete. Ebiya bantu papo abashikata mu kibundi belwe’ko. Ba Nehemia ne Ezela abafundija bantu bijila bya Leza, bantu nabo abasangala.

Inoko bintu kebikelepo na mobyādi bikadile pādi kepaselelwe Bene Isalela bu misungi mu Babiloni. Bantu bakiludikwa ne kwingidila mulopwe wa Peleshia. Ino Yehova walaya kutuma mulopwe mupya wakupa bantu ndoe. Lelo uno mulopwe i ani? Le ukaletanga ndoe pa ntanda muswelo’ka? Pabapite myaka 450 kumeso kwa bantu kuyuka uno mwanda. Penepo kubaikala lubutulo lwa mwana wa bulēme. Ino i mānga mikwabo.