TALA’PO kintu kibi mpata kyalongwa! Yesu waipaibwa. Abamutundika ku mutyi. Kadi i mupopwe misumadi ku makasa ne ku maulu. Mwanda waka abasake kulonga Yesu uno muswelo?

Mwanda bantu bamobamo i bashikwe Yesu. Le wibayukile i bāni? Umo bidi i mwikeulu umbi Satana Dyabola. Ye aye wāongwele ba Adama ne Eva baleke kukōkela Yehova. Kadi i enka Satana watonona balwana na Yesu balonge kino kintu kibi mpata.

Nansha Yesu paadi kapopelwe ku mutyi, balwana nandi badi bamulongela’nka bibi. Ukivulukile mobaidile kumusela mu budimi bwa Ngesemani? Balwana’ba badi bāni? Eyo, badi bendeji ba bipwilo. Tutalei bikwabo byamufikila.

Yesu pa kuselwa na bakulumpe ba bipwilo, batumibwa bandi abanyema. Abashiye Yesu bunka na balwana nandi, mwanda wa moyo. Inoko mutumibwa Petelo ne Yoano kebanyemenepo kulampe. Abalonda kato-nyuma mwanda wa kutala bikafikila Yesu.

Ebiya babitobo abakatwala Yesu kwa mukulumpe Anasa, wadi kitobo mukatampe. Kibumbo kekijijepo kuno. Kupwa abakatwala Yesu kwa Kaifasa, kitobo mukatampe pano. Bakulumpe ba bipwilo bavule abakebungila ku njibo yandi.

Ebiya abakute kidye kuno kwa Kaifasa. Abatweja bantu ba kubepela Yesu bya bubela. Bendeji ba bipwilo bonso abanena’mba: ‘Yesu epaibwe.’ Kupwa abamupelela mata mu mpala ne kumukupila mapi.

Palongwa byonso bino’bi, Petelo udi panja mu kipango. Mashika adi’ko bufuku’bu, bantu papo bota mudilo. Abo bajokolokele ku mudilo, mwingidi mwana-mukaji watale Petelo, kanena’mba: ‘Yeu muntu wadi na Yesu.’

Petelo walondolola’mba: ‘Ami nkyadipo nandi!’

Bantu abanena Petelo misunsa isatu’mba wadi na Yesu. Ino Petelo utuna’nka kutuna’mba i bya bubela. Petelo pa kunena’byo musunsa wa busatu, Yesu waalamuka wamutale. Petelo wafitwa mwanda wanena bya bubela, watambe wenda udila.

Byokidi ke kibanga mu Dya Butano, babitobo abaenda na Yesu ku Kidye Kikatampe. Kupwa abaanza kwisamba mobasa kumulongela. Penepo abakamutūla kwa Pontyusa Pilato, mbikavu wa Yudea.

Babitobo abalombola Pilato amba: ‘Uno muntu i mubi. Ufwaninwe kufwa.’ Pilato waipangula Yesu bipangujo, kupwa wanena’mba: ‘Kimwenepo kibi kyalongele.’ Ebiya Pilato watume Yesu kwa Heloda Antipese. Heloda i mbikavu wa Ngadilea, inoko ushikatanga mu Yelusalema. Heloda nandi kamwenepo kibi kilongele Yesu, penepo wamujokeja kwa Pilato.

Pilato wasake kulekelela Yesu. Ino balwana na Yesu abasake balekelele wa buloko ungi pa kyaba kyandi. Uno wa buloko i ngivi witwa bu Balabasa. Ke kubwipi na midi, Pilato walupula Yesu. Wanena bantu’mba: ‘Talai! Mulopwe wenu yao!’ Ino babitobo bakulu abaela lubila’mba: ‘Muselei! Mwipayei! Mwipayei!’ Penepo Pilato walekelela Balabasa, abasela Yesu kebakamwipaya.

Dya Butano ku kyolwa, abapopa Yesu ku mutyi. Ku lundyo ne ku lunkuso kwa Yesu kudi tubwalāla tubidi twaipaibwa ku mityi, inoko ketudipo pa kifwatulo’pa. Yesu kubwipi na kufwa, kabwalāla kamo kabamunena’mba: ‘Ukamvuluka’po pokatwela umbulopwe bobe.’ Penepo Yesu walondolola’mba: ‘Nakulaya’mba ukekalanga nami mu Paladisa.’

Mwene uno i mulao wa kutendelwa? Lelo uyukile paladisa isambila’po Yesu’i? Le Paladisa yālongele Leza ku ngalwilo yādi kwepi? Eyo, i pano pa ntanda. Pakaludika Yesu bu mulopwe mūlu, ukasangula uno muntu ekale mu Paladisa impya pano pa ntanda. Mwene tufwaninwe kusangela uno mwanda?